Др Марияна Шпика Ачански, (мац єй Рускиня, Наталия Малацко з Руского Керстура), народзена 3. априла 1963. року у Новим Садзе, дзе закончела основну и стредню школу з одличним успихом, а потим уписала Технолоґийни факултет у Новим Садзе.
Порядни студиї закончела 1987. року и такой предлужела треци ступень студийох, маґистерски студиї, по тедишнїм способе студированя, же би по одбрану дохтората зоз технолоґийних наукох сцигла 1999. року.
Пред тим, ище 1989. року, достала роботу як асистентка на матичним факултету на хторим успишно преходзела академски образовни ґарадичи – асистентка, доцентка, позарядова професорка, же би порядни професор на Технолоґийним факултету Универзитета у Новим Садзе постала 24. фебруара 2009. року, на хторим и нєшка преподава и занїма ше зоз науково-виглєдовацку роботу на Катедри за применєну и инжинєрску хемию.
Професорка др Марияна Ачански преподава на основних академских студийох Общу и нєорґанску хемию и Рахованє у хемиї, на мастер студийох Сучасни методи контроли автентичносци поживи, а на дохторских студийох Чечну хроматоґрафию активних єдинєньох и Вибрани методи контроли авентичносци поживи.
Автор є и коавтор понад 200 библиоґрафских єдинкох, од хторих понад 40 роботи на лїстини SCI. Тиж так, автор є або коавтор трох практикумох, пейц моноґрафийох националного и медзинародного значеня. У своєй богатей наставно-науковей кариєри усовершовала ше на универзитетох и институтох у ЗАД, Словениї и на Тайланду.
Контакт꞉ marijanaacanski@uns.ac.rs