Ирина Папуґа народзена 12. новембра 1946. року у Бачинцох, до основней школи хoдзела у Бачинцох и Куковцох, а штредню, Висшу педаґоґийну и Филозофски факултет, наставна ґрупа Педаґоґия, закончела у Новом Садзе. Робела у Руским Керестуре, Покраїнским секретарияту за образованє, науку и културу, Културно-просвитней заєднїци Войводини и Заводзе за културу Войводини у Новим Садзе.

Була посланїца Просвитно-културней ради Скупштини АП Войводини, членїца Просвитного совиту Войводини, помоцнїца покраїнского секретара за образованє, науку и културу, предсидателка Скупштини Дружтва за руски язик, литературу и културу. Тераз є секретарка Дружтва и секретарка Координацийного одбору дружтавох за язики, литературу и културу, Нови Сад.

Обявела 252 фахово написи и прилоги з обласци образованя, просвити и култури на сербским и руским язику у часoписох и едицийох: «Руске слово», «Шветлосц», «Народни календар», «Руски календар», «Заградка», «Мисао», «Педагошка стварност», «Просветни преглед», «Сремске новине», «Сунчани сат», «Шидина», «Пчеса», «Studia Ruthenica», Мултиязички билтен «Мост», Зборнїк САНУ и Матици сербскей, на интернету (Канада) итд.

Участвовала у вецей виглєдовацких проєктох, медзи хторима и проєкт «Розвиванє и унапредзованє руского язика дзецох и школярох», зоз хторим у школох дзе жию Руснаци спатрене виучованє руского язика.

Авторка є трох кнїжкох:

  • «Русинска гимназија / Руска ґимназия» (2000),
  • «Основна школа Бачинци» (2008) и
  • «Русинска ’Просвета‘ у Бачинцима / Руска ’Просвита‘ у Бачинцох» (2013), а тиж и редактор, або пририхтовач понад 40 кнїжкох, публикацийох и часописох.

За закладанє у роботи и културно-образовних активносцох достала вецей припознаня, медзи хторима:

  • Медаля заслугох за народ (Беоґрад, 1980),
  • Златна значка Културно-просвитней заєднїци Сербиї (Беоґрад, 1993),
  • Повеля Основней школи и ґимназиї «Петро Кузмяк» (Руски Керестур, 2003),
  • Припознанє Националного совиту рускей националней меншини Сербиї (Нови Сад, 2008),
  • «Святосавска повеля» Општини Шид  (Шид, 2014)
  • Плакета «Кирил и Методий» Медзинародного конґресу русинского язика (Прешов, 2015).

Ирина Папуґа члан Академиї за културу Руснацох/Русинох швета (Торонто, Канада, 2007).

Жиє и роби у Новим Садзе.