Новинарка, дружтвена дїячка, директорка
Мартица Тамаш (дзивоцке Папуґа) народзена у Бачинцох (општина Шид) 8. новембра 1961. року. Основну школу закончела у Бачинцох, стредню школу у Шидзе, а Филозофски факултет, напрям сербскогорватски язик и югославянска литература, у Новим Садзе. Крадки час, 1985. року, робела як лекторка у Рускей редакциї Радио Нового Саду. Професийну кариєру предлужела у НВУ ”Руске слово” 1986. року, як новинарка и дописователька. Робела за Радио Нови Сад, Телевизию Войводини, новинску аґенцию БЕТА. Єдна є з перших сотруднїкох дньовей информативней аґенциї ”Рутенпрес”. Авторка є єдного числа текстох у двох кнїжкох о Културно-уметнїцким дружтве ”Карпати”. Авторка є моноґрафиї ”60 роки Активу женох у Коцуре”.
На место директора НВУ ”Руске слово” є вибрана 2010. року и на тей функциї є уж други мандат.
Участвовала на семинарох зоз обласци унапредзеня медзиетнїчних одношеньох, информованя на язикох националних меншинох, зоз обласци родней ровноправносци.
За предсидательку Новинарскей асоцияциї Руснацох НАР є вибрана 2010. року, а мандат обновела и 2016. року. Авторка є и реализаторка даскелїх проєктох зоз обласци унапредзованя професийних стандардох у медийох котри информую на язикох меншинох.
Жиє у Вербаше.