Писатель, драматурґ, сценариста, привреднїк

Мирон Канюх народзени 9.11.1943. у Дюрдьове.Школовал ше у Дюрдьове, Руским Керестуре, Вербасу  у  Новим  Саду. Закончел Природно математични факултет–ґрупа за математику и физику у Новим Саду 1966.

Ище як студент почал робиц у Радио Новим Саду як помоцни дактилоґраф потим и як младши сотруднїк и редактор младежскей емисиї.

Робел як симултани прекладатель у Скупштини АПВ,  бул директор у КУД „Максим Горки“ у Новим Саду. Од 1973. по 1978. бул новинар и редактор видавательного оддзелєня НВУ Руске слово.

После того бул секретар Дружтва писательох Войводини,врацел ше на место редактора видавательного оддзелєня НВУ Руске слово а потим робел у радио–драмскей продукциї Радио Нового Саду  и охабел нєвисцеруюци шлїд як писатель и режисер радио драмох. Бул секретар Културно просвитней заєднїци Войводини. Основал подприємство за продукцию алкоголу „Финессе“ у Раковцу дзе бул директор.

Канюх познати руски писатель.Написал штири кнїжки прози „Добридзенка“, „Празни цек“, „Остатнї викрок“, „Пах“, и кнїжку поезиї „Шайкашка жем червена“.Тиж так написал театрални драми „Концерт за пса и шмеце“, „Велька птица“ и „Вистнїк“ як и числени дзецински, радио и тв драми. Познати є и як  писатель гуморескох. Прекладал зоз сербского, словацкого и росийского язика.

Канюх  бул и уметнїцки руководитель  АРТ „Дядя“ и єден з найуспишнєйших режисерох.

Од 1993. виучує психо–ментал–психо ориєнтолоґию и  дошлїдно сознаньом и прешвеченьом 2008. пременєл власне мено до Михеон ХУН–КАН.Под тим меном обявел  фахово кнїжки „Найчитанша кнїжка швета“, „Правда о библийскей маґї“ и „ГуманШвет“ по серпски, кнїжку приповедкох за дзеци“ Мудрило“  по руски як и даскельо театрални драми и монодрами.

Добитнїк є  награди  „Невен“  за дзецинску литературу, „Светозар Маркович“ за новинарство , Плакети ПС ССРН Войводини  и Искри култури КПЗ Войводини.

Жиє, твори и дїлує  у Раковцу.

Литература

  1. Под меном Мирон Канюх- Михеон ХУН-КАН   на интернету єст вецей як дзешец боки
  2. Дюра  Латяк  Моноґрафске виданє  25 роки АРТ–РНТ „Дядя”,
  3. Дюра Латяк Моноґрафия Театрални живот Руснацох
  4. https://www.youtube.com/watch?v=NztiOUHgsds
  5. http://www.dkv.org.rs/index.php?option=com_content&task=view&id=255&Itemid=6
  6. Мирон Канюх, Доприношенє Руснацох розвою Нового Саду, аудио сериял, Новинарска асоцияция Руснацох, www.nar.rg.rs