Поет, прозаиста, литературни критичар и педаґоґ
Владимир Ґарянски народзени 2. юлия 1959. року у Осєку (Горватска). Основну и стредню хемийно-технїчно-технолоґийну школу закончел у Вербаше. У Новим Садзе перше студирал на Польопривредним факултету, а вец на Катедри за руски язик и литературу, дзе и дипломовал 1987. року. Маґистерску роботу на тему Гранїчни ситуациї у дїлу Данила Киша одбранєл 1991. року. Од 1988. до 1992. року робел як асистент за руску литературу Филозофского факултета у Новим Садзе. Од 1992. року робел як фахови асистент за южнославянски язики и литератури на Катедри за словацки язик и литературу, а потим на Катедри за славистику Филозофского факултета у Пряшове. Написал доцентску роботу Стратеґиї потребох и феномен субєкта, алє пре чежку хороту плановану габилитацию нє сцигнул реализовац.
У рускей литератури Владимир Ґарянски ше зявел концом седемдзешатих рокох. Писал на руским и сербским язику и обявел шейсц кнїжки поезиї. Поезия му прекладана на словацки, македонски, румунски, мадярски и українски язик. За кнїжку на сербским язику Сеча достал награду за найлєпшу кнїжку рока у Едициї „Стражилово” за 1989. рок. Заступени є у трох антолоґийох рускей поезиї, як и у даскелїх зборнїкох югославянскей поезиї. Ношитель є награди часописа Шветлосц – Микола М. Кочиш за 1995. рок.
Умар у Пряшове 1996. року.
Литература
- Интеґрални текст за биоґрафску єдинку Владимир Ґарянски
- Мено Владимир Ґарянски ше на интернету находзи на вецей як дзешец боки