Др Милутин Ґубаш народзени 1893. року у Дюрдьове у землєдїлскей фамелиї. Основну школу закончел у родним валалє, Сербску ґимназию у Новим Садзе, а потим ше уписал на Медицински факултет у Будапешту, предлужел студиї у Праги, дзе и дипломовал. По законченим обовязним лїкарским стажу почина робниц як лїкар у Амбуланти державней желєзнїци у Новим Садзе, дзе робел цали роботни вик. Паралелно з тим, лїчел жительство, обичних роботнїкох и худобу на новосадским населєню Телеп. Окрем сербского и руского, знал по нємецки, мадярски и чески. Важел за велького гуманисту, участвовал у акцийох за зберанє помоци худобним дзецом и за тоту роботу достал вецей припознаня подзековних гражданох.
Др Ґубаш бул єден зоз сновательох и перши предсидатель Културно-просвитного союзу югославянских Руснацох, редактор и финансиєр новинки “Заря” хтора виходзела од 1936. по початок войни, у априлу 1941. року. Коло новинки ше сходзели руски интелектуалци хтори ше закладали за врацанє поунияцених Руснацох зоз грекокатолїцкей до православней вири, як же би ше чежиско Руснацох унапрямело ґу Русиї, а нє ґу України. Тримал и закладал ше за тото же би Руснаци мали можлївосц вибору у одношеню на вирску припадносц, як и вибору у воспитаню у одношеню вибор за гражданску або вирску опредзелєносц.
Умар 1974. року.