Др Янко Жилник народзени у Коцуре 1881. року у фамелиї маєтних землєдїлцох. Основну школу закончел у родним месце, а ґимназию у Новим Садзе на мадярским и нємецким язику. На Медицинским факултету у Будапешту дипломовал 1906. року. Перша робота му була  у Солноку на Тиси у Воєней команди, дзе як воєни лїкар робел полни штири роки. Потим, коло два роки роби у своїм родним месце у Коцуре, а вец, пред Першу шветову войну,  преходзи з фамелию до Нового Саду и уселює ше до хижи хтору му купел оцец, у Косовскей улїци число 1. У малженстве зоз Францишку Стоянович мал сина Павла хтори през живот постал углядни и познати архитекта и универзитетски професор. Отворел свою приватну лїкарску ординацию у терашнєй Змай Йововей улїци число 26 и нєодлуга ше почал занїмац з професию рентґенолоґа. Бул медзи першима лїкарами у Новим Садзе, а вшелїяк и перши Руснак хтори ше занїмал з тоту специялносцу. Блїзко сотрудзовал з тедишнїма найугляднєйшима новосадскима лїкарами (др Шосберґером, др Адамовичом, др Трифковичом), писал велї популарни статї з рижних обласцох здравственей култури хтори обявйовал у Руских новинох и Руских календарох. Окреме були замерковани статї о теди актуалних здравствених темох у вязи з оберацима хоротами, пегавим тифусом, дизентерию, колеру и под. По краткей хороти нагло умар 30. януара 1925. року у 43. року живота.