Новинар, писатель, прекладатель, сценарист

Михал Рамач народзени 1951. року у Руским Керестуре. Класичну ґимназию и лицей (Українску папску малу семинарию) закончел у Риме, дипломовал историю на Филозофским факултету у Новим Садзе. Робел як новинар у «Руским слове» (1975-1986), «Дневнику» (1986-1996) и Радио-телевизиї Войводини (2009-2016). Бул главни и одвичательни редактор новинох «Наша Борба», «Войводина» и «Данас», дописователь Радия «Шлєбодна Европа», аґенциї Укринформ и даскелїх иножемних новинох, редактор часописа «Дзвони».

Обявел кнїжки писньох: «Либерато за єдно лєто» (1973), «Шитар» (1982), «Сказка о гушлярови и гушлї» (1986, преложена на сербски, словацки, мадярски и румунски), «Рапух медзи гвиздами» (1988, преложена на ґрузийски), «Чукундїдов ошмих» (2003), «Повист о Данилови и Феркови и Ґаброви» (2008). По сербски обявел кнїжки есейох «Повест о почетку краја» (2002), «С оне стране снова» (2002), «6. октобар» (2008) и «Дунавска рапсодија» (2018). Бул член Дружтва писательох Войводини (до 1992). Член Союзу писательох України.

Вєдно з др Янком Рамачом и др Тадейом Войновичом преложел на руски з давногреческого Нови Завит, з др Янком Рамачом Стари Завит. Преложел на руски або з руского на сербски коло штерацец кнїжки, медзи иншима твори Десанки Максимович, Бошка Ивкова, Петка Войнича Пурчара, Олеса Гончара, Мирослава Антича, Лази Костича, Сент Еґзиперия, Колодия, Пушкина, Маяковского, Байрона… Пририхтал антолоґию рускей поезиї «Ми ту нє госци» (Ужгород 1997), котра вишла паралелно по руски и українски (преложел Петро Скунць).

По його сценарию знята телевизийна серия «Дунай, занавше» и седем сериї о розпадованю Югославиї и воєних дзеведзешатих рокох под заєднїцку назву «Було то…».

Бул єден зоз сновательох Нєзависного дружтва новинарох Войводини (1989).

Предсидатель України одликовал го з Орденом Ярослава Мудрого. Добитнїк припознаня «Витяз професиї» и новинарских наградох «Светозар Милетич», «Светозар Маркович», «Станислав Маринкович» и «Славуй Хаджич».

Литература

  1. Мено под биоґрафску єдинку Михал Рамач ше на интернету зявює на вецей як 13 бокох