Специялист за гиґиєну

Народзел ше 28. децембра 1937. року у Шайкашу, општина Тител. Фамелия ше  1945. року  преселєла до Нового Саду, дзе  Владимир закончел основну школу, ґимназию у Сримских Карловцох, а Медицински факултет 1967. року у Скопю.

Лїкарски стаж закончел у Новим Садзе, а од 1968. є стаємно заняти у Заводу за гиґиєну Института за здравствену защиту у Новим Садзе, дзе робел аж по одход до пензиї 2002. року. У Заводу до януара 1982. року окончовал роботи руководителя Служби вчасного одкриваня хоротох нєдостаточного и нєправилн ого костираня на теренє. Од 1982. є перше окончователь длужносци, а од 1983. директор Заводу и на тей длужносци по одход до пензиї.  На вимогу Вивершней ради АПВ, вєдно зоз сотруднїками написал першу студию о аерозабрудзеню у Войводини.

За успишно окончени задатки под час НАТО аґресиї одликовани є 1999. року з Орденом за заслуги у обласцох одбрани и безпечносци першого ступня.

Як признати фаховец участвовал на велїх конґресох и наукових сходох у жеми и иножемстве и обявел понад 100 фахово и науково роботи у домашнїх и странских часописох. За свою роботу достал велї  друштвени и професийни припозная.

Лїкар участвовал у настави на Медицинским факултету як фахови сотруднїк и бул активни у велїх акцийох. Бул предсидатель Дружтва Войводини за борбу процив цукровей хороти и член велїх здравствених и других асоцияцийох. Так бул и член  Управного одбору Ґеронтолоґийного центра  Нови Сад, Управного одбору НВУ „Руске слово“ Нови Сад, а 23 роки бул и член Општинского и Городского штаба цивилней защити у Новим Садзе.

У шлєбодним чаше є активни и у новосадских спортских  и других орґанизацийох. Член є предсидательства Спортского дружтва Нови Сад и член Конференциї Фодбаского клуба Нови Сад. Предсидатель є Городского союзу за одховйованє дробних животиньох, предсидатель Скупштини задруґарох живинарскей задруги „Живинарство“ Нови Сад.

Од дзецинства ше занїма зоз спортским риболовом и голубарством. Зоз своїма голубами участвовал на велїх виставох у жеми и иножемстве (Мадярска, Румуния, Болгарска, Австрия, Французка, Нємецка, Русия), дзе його голуби доставали шампионски титули.

Як пензионер жиє у Новим Садзе.