Специялист за ґинеколоґию и акушерство
Народзел ше 7. авґуста 1937. року у Дюрдьове, дзе закончел и основну школу. Ґимназию закончел у Новим Садзе (1956), а Медицински факултет у Беоґрадзе (1957-1963). Обовязни лїкарски стаж 1964. року закончел на Медицинским факултету у Новим Садзе. Од 1965. по 1969. рок робел як лїкар общей пракси и управитель Здравственей станїци у Дюрдьове, а од 1970. по 1977. рок є управитель Диспанзера за жени зоз породзилїщом у Жаблю.
У чаше од 1978. по 1986. рок роби як лїкар специялист у Институту за онколоґию, Клиника за оперативну онколоґию, Ґинеколоґийне оддзелєнє у Сримскей Каменїци. Од 1987. по 2002. рок, т.є. по одход до пензиї, є шеф Оддїлу за преопревентивну приготовку, Ґинеколоґийне оддзелєнє, Клиники за оперативну онколоґию Института за онколоґию у Сримскей Каменїци. Медзитим, ище од 1999. року, и познєйше як пензионер, окончує операциї на поволанку, препатрунки и консултациї на Специялним гирурґийним шпиталю „Здравє“ у Бачким Петровцу, а од 2008. з часу на час роби у ґинеколоґийней амбуланти „Еуролаб“, Лабораториї зоз поликлинику у Новим Садзе.
Под час роботи, вєдно зоз своїма колеґами, у рижних фахових часописох обявел понад 40 роботи зоз обласци ґинеколоґийней онколоґиї. Обявел и понад 20 популарни статї зоз ширшей обласци ґинеколоґиї и акушерства у Руских календарох од 1970. по 2010. рок, а паметаю ше и його едукативни преподаваня з обласци ґинеколоґийней онколоґиї на превенциї малиґних охореньох долнього ґениталного тракта при женох, котри отримал у Новим Садзе, Петроварадинє. Дюрдьове и у Руским Керестуре.
За свою фахову роботу достал велї припозная, дипломи, подзекованя, а од 2009. року, з Одлуку Совиту Месней заєднїци, постал и почесни граждан Дюрдьова.
Як руски школяр и интелектуалєц, и нєшка як пензионер провадзи шицки руски манифестациї и член є Дружтва за руски язик, литературу и културу у Новим Садзе, дзе 2007. року зоз сотруднїками, як редактор, видал Словнїк медицинскей терминолоґиї (сербско-латинско-руски).