Дюра Латяк*
ХРАНИЛОВИЧ, о. ЙОВАН
Грекокатолїцки парох новосадски, новинар, писатель и дружтвени дїяч
Народзел ше 18. децембра 1855. року у Кричкох (даґдзе ше водзи же у Петровим Полю, котре спада тиж до парохиї Крички, Далмация), дзе його оцец Микола теди бул парох, а оталь бул познєйше премесцени до Сошицох (Жумберак). Мац Сидония му була зоз Крижевцох. Мали пецеро дзеци: Драґутина, двойнята Миколу и Йована, Марию и Владислава.
До основней школи почал ходзиц у Сошицох, алє по оцовей шмерци (1864) мац преселєла до Крижевцох и Йован там предлужел школованє. Уж як школяр шестей класи ґимназиї почал ше интересовац за поезию и упознал ше зоз писателями Антом Ковачичом и Авґустом Шеноом.
Перши рок богословцких студийох закончел у Заґребе, а вец прешол до Бечу, дзе попри богословиї слухал и преподаваня познатого слависти Миклошича и филозофа Бретана.
За священїка бул пошвецени нєоженєти 1878. року. После службованя у вецей местох у Жумберку, дзе пре свою дружтвену дїялносц священїцки обовязки тримал як другозначни, тедишнї крижевски владика Илия Хранилович (котрому бул и родзина) го послал за капелана до Коцура (1886), а вец до Керестура (по 1889), одкаль у авґусту 1889. року постал грекокатолїцки парох у Новим Садзе.
И у Новим Садзе йому дружтвена активносц була на першим месце, дзекуюци котрей ту здобул вельки угляд медзи новосадску интелиґенцию, та єден час бул и предсидатель новинарскей орґанизациї и редактор демократских новинох „Єдинство“. Дня 25. новембра 1918. року предшедовал Велькей народней скупштини у Новим Садзе, на котрей принєшена одлука о присоєдинєню Войводини до Сербиї и войсц до составу новоствореней держави Кральовини Сербох, Горватох и Словенцох.
За войводянских Руснацох Йован Хранилович значни прето же мал приятельски одношеня зоз тедишнїм дюрдьовским парохом о. Дюром Биндасом, на чию молбу ше Хранилович анґажовал коло обезпечованя потребних условийох за отримованє Сновательней схадзки Руского народного просвитного дружтва у Новим Садзе 1919. року. Ту вон обезпечел потребни дозволи од тедишнїх власцох, ноцованє делеґатох и змесцованє коньских запрагох (бо векшина делеґатох припутовала до Н. Саду на селянских кочох), а – цо найважнєйше – и святочну салу Новосадского маґистрата за отримованє зашеданя! На предлог о. Дюри Биндаса Хранилович и предшедовал на Сновательней схадзки Руского народного просвитного дружтва 2. юлия 1919. року.
Умар у Новим Садзе 5. авґуста 1924. року. Поховани є на новосадским руским теметове. Його памятнїк у форми обелиска, котри подзвигла новинарска орґанизация, нєшка под защиту держави.
ЛИТЕРАТУРА:
- о. Проф. Др Роман Миз: Священїки дакедишнього Осєцкого викарията; видавателє: Парохия св. Петра и Павла, Нови Сад и „Максима“ друкарня и видавательна хижа, Петроварадин, 2016, б. 329-332.
- Дюра Латяк, писатель, публициста