Дюра Латяк*

 ТИМКО, о. ОНУФРИЙ

Наш познати историчар, етномузиколоґ, мелоґраф, композитор и хорски дириґент.

 Народзел ше 5. октобра 1908. року у Коцуре. Основну школу закончел у своїм валалє, до ґимназиї почал ходзиц у Вербаше, а закончел ю у Травнику. Богословию започал студирац на Теолоґийним факултету у Заґребе, и закончел ю у Львове (Україна). Оженєл ше зоз учительку Ану Биндасову, дзивку Дюри Биндаса священїка и першого подпредсидателя Руского народного просвитного дружтва. Крижевски владика Дионизий Няради го пошвецел 14. октобра 1934. року у Заґребе.Службовал  у Руским Керестуре, Лишнї (Босна), и Баня Луки, а 1. децембра 1945. року є премесцени до Коцура. Парох у Старим Вербаше постал 18 фебруара 1950. и там службовал по 12. април 1971. року, кед пошол до пензиї.

Под час школованя пришол до вираженя його талант и любов ґу музики, котри од малючка нашлїдзел од свойого оца, котри крашнє грал на гушлї, а и мац знала крашнє шпивац. У Львове Онуфрий ше упознал зоз професором др Филаретом Колессом, од котрого ше вельо научел и спатрал ше на ньго у своєй етномузиколоґийней роботи през цали живот. Од нього здобул добри теорийни музични фундамент и практичне искуство у зазберовацкей мелоґрафскей роботи. Добре преучел модерну музичну етноґрафию котра ноши назву Крон-Бартокова метода, котру применєл у систематизациї нашей народней шпиванки. У своєй зберацкей роботи вон бул нє лєм записовач народних мелодийох, алє велї записани мелодиї дорабял, збогацовал, прерабял, на велї народни тексти присподобйовал, або сам складал мелодиї у народним и забавним духу.

Онуфрий Тимко, попри етномузиколоґийних студийох и теорийних написох, зохабел за собу и значне число статьох з нашей историї. Окреме значне його доприношенє у ошвицованю насельованя наших предкох до Руского Керестура и Коцура.

Автор є штирох томох капиталного виданя з нотним укладом под насловом „Наша писня“, потим писньох за дзеци под насловом „Мали соловей“ и понад 40 науково роботи обявел у часописох, календарох и зборнїкох.

Умар у Вербаше 24. авґуста, а поховани є 25. авґуста 1989. року на вербаским теметове.

ЛИТЕРАТУРА:

  1. о. Проф. Др Роман Миз: Священїки дакедишнього Осєцкого викарията; видавателє: Парохия св. Петра и Павла, Нови Сад и „Максима“ друкарня и видавательна хижа, Петроварадин, 2016, б. 311-312.
  2. „Шветлосц“ ч. 6/1989, б. 768-775.

 

*Дюра Латяк, писатель, публициста

Календар висткох
юлий 2024
M T W T F S S
1234567
891011121314
15161718192021
22232425262728
293031  
Найновше
новембер 30, 2023
новембер 30, 2023
новембер 30, 2023
новембер 30, 2023
новембер 29, 2023
Нащивце