Писатель, новинар, главни и одвичательни редактор часопису за литературу, културу и дружтвени питаня „Шветлосц”, драмски дїяч и инициятор вецей културних манифестацийох

Народзел ше у Руским Керестуре 11. новембра 1936. року. Оцец Дюра, мац Маґдалена, народзена Роман. Основну школу и нїзшу ґимназию закончел у своїм валалє, стредню физкултурну школу у Новим Садзе дзе  и дипломовал югославянску литературу. Робел як наставнїк у Вербаше и Руским Керестуре a потим як новинар у Редакциї новинох „Руске слово. Полни 27 роки бул главни и одвичательни редактор обновеного часопису „Шветлосц”. Бул драматурґ, а потим и директор Драми Сербского народного театра у Новим Садзе (1979–1982). Визначни є поета, прозни и драмски писатель, литературни критичар, антолоґичар и театрални режисер. Автор є  векшого числа кнїжкох поезиї и прози за одроснутих и за дзеци. Написал 23 драми, котри  виводзени на сцени або на радию. Даєдни з його творох преложени и на други язики (сербски, словацки, росийски, мадярски, румунски, українски, летонски, єрменски).

Як режисер є зазначени 1960. року у КПД „Максим Горки” у Новим Садзе. Ґлумиц почал як школяр висших класох основней школи у Руским а предлужел у Новим Садзе и Вербаше. Єден є спомедзи найзначнєйших иницияторох снованя Аматерского руского театра „Дядя” зоз сценами у Новим Садзе и Руским Керестуре и длугорочни його уметнїцки руководитель и режисер.

За свою плодну роботу на вецей польох култури достал векше число значних наградох и припознаньох. Найзначнєйши медзи нїма то: Награда „Невен” (1980), Искри култури КПЗ Войводини (1982), Орден Републики Сербиї зоз бронзовим венцом (1982.), Октоберска награда городу Нового Саду (1984), Вукова награда КПЗ Сербиї (1996), Награда „Александер Духнович” (1997) и Награда за животне дїло Дружтва писательох Войводини. Бул ношитель националней пензиї.

До скорейчасовей пензиї пошол 1993. року зоз длужносци главного и одвичательного редактора часопису „Шветлосц”. Умар 15. марца 2008. року у Новим Садзе, а поховани є 17. марца  на теметове у Руским Керестуре.

Литература

  1. Интеґрални текст за биоґрафску одреднїцу Дюра Папгаргаї
  2. https://www.unipo.sk/public/media/14248/Spomienky%20na%20Filozoficku%20fakultu%20v%20Presove.pdf
  3. https://issuu.com/svetlosc/docs/01_svetlosc_-_2017_text_web
  4. https://issuu.com/ruskeslovo2012/docs/ruskeslovo_15_3572
  5. https://zavod.rs/wp-content/uploads/2015/03/CERVENA-RUZA-II-WEB.pdf
  6. https://digitalna.ff.uns.ac.rs/sites/default/files/db/books/Zbornikvelicinamalih.pd
  7. https://www.rusynacademy.sk/image/1-2008.pdf
  8. https://www.druztvo.org/ruski/vidania/5a%20Studia%20Pdf%20Ruthenica%2018%20za%202013..pdf
  9. https://www.rusuk.org/robotni/GLAS%20SOJUZU%209.pdf
  10. https://rdsa.tripod.com/biografiji.htm
  11. Дюра папгаргаї, ,Доприношенє Руснацох розвою Нового Саду, аудио сериял , Новинарска асоцияция Руснацох, https://nar.org.rs