Публициста, новинар, прекладач, длугорочни дружтвено-културни дїяч у рамикох рускей националней заєднїци
Дюра Латяк народзени 31. октобра 1933. року у Руским Керестуре. Закончел новинарску школу 1951. року у Беоґрадзе, Висшу школу дружтвено-политичних наукох 1962. року и штири семестри Правного факултета у Новим Садзе. Свой роботни вик препровадзел спочатку як новинар у Рускей редакциї Радио Нового Саду, а потим як новинар у Редакциї новинох „Руске слово”. Од априла 1963. року є меновани за главного и одвичательного редактора спомнутих новинох, а у септембру 1965. и за директора Новинско-видавательного подприємства „Руске слово”. Тоти два длужносци окончовал по конєц фебруара 1970. року. Теди є меновани за главного и одвичательного редактора Редакциї видавательней дїялносци у НВП „Руске слово”. На тей длужносци остал полни 19 роки и то бул „златни период” видавательней дїялносци на нашим язику. По одход до пензиї остатнї нєполни два роки (1989–1990) робел як шлєбодни новинар у Редакциї „Руске слово”. Як пензионер, од 1992. по юний 1999. року гонорарно робел як новинар и спикер-модератор у емисиї на українским язику „Українські обрії”
Перша приповедка У тлачидби обявена му 1951. року у новинох „Руске слово”, а першу писню Витай, писньо обявел у Народним календаре за 1957. року. Гумористичну прозу почал писац два децениї познєйше, особлїво интензивно после 1976. року, кед на Радио Новим Садзе запровадзена емисия „На габох музики и гумору” дзе велї роки участвовал и як ґлумец.
Автор є кнїжки прози Тал и други приповедки и гумористично-сатиричней збирки Ферков дньовнїк, коавтор є, або автор, вецей антолоґийох поезиї и прози на руским, сербским и українским язику, моноґрафийох, наукових сообщеньох на вецей симпозиюмох и науково-фахових сходох, есейох, оглядох и значного числа биоґрафийох и творчих портретох руских писательох. З моноґрафийох му найзамеркованши: Руске слово 1945-1985, потим 25 роки АРТ–РНТ „Дядя”, и двотомнїк Театрални живот Руснацох, а познати є и як добри литературни прекладач поезиї и прози зоз вецей славянских язикох. Пише по руски, по сербски и по українски.
Дюра Латяк вельорочни дружтвено-културни дїяч у рамикох рускей националней заєднїци и ширше. Єден час бул подпредсидатель Дружтва новинарох Войводини, предсидатель Кнїжовней заєднїци Нового Саду, предсидатель Дружтва писательох Войводини и у исти час член Предсидательства Союзу писательох Югославиї, предсидатель Союзу аматерских театрох Войводини и предсидатель Културно-просвитней заєднїци Нового Саду.
За вкупну дїялносц на полю култури достал велї припознаня и одликованя, медзи котрима Орден роботи зоз стриберним венцом, Орден братства и єдинства зоз стриберним венцом, Октоберска награда Нового Саду, Повеля Нового Саду, „Искру култури” КПЗ
Войводини , Златна значка КПЗ Сербиї и други.
Литература
- Под меном Дюра Латяк на интернету єст 11 одреднїци
- Моноґрафия Руске слово 1945-1985,
- Моноґрафске виданє 25 роки АРТ–РНТ „Дядя”,
- Моноґрафия Театрални живот Руснацох.