Єден спомедзи найславнєйших ґлумцох котри вироснул зоз рускей заєднїци и охабел глїбоки шлїд на театралним и филмско телевизийним полю Югославиї
Драґутин (Драґен) Колєсар – Коле ше народзел 11. октобра 1929. року у Бачинцох дзе закончел штири класи основней школи а 1940. року уписал ше до класичней ґимназиї у Заґребе, алє пре воєни обставини нє матутровал. Школованє предлужує 1949./1950. року у Новим Садзе у Театралней школи котру закончує 1953. року и пошвидко достава анґажман у новосадским Сербским народним театру.
На початку 1949. року у Бачинцох самостойно поставя на сцену Нушичового Аналфабету, дзе є ношитель главней улоги. Мария Горнякова-Пушкашова, з нагоди 15-рочнїци його професийней ґлумецкей роботи констатовала же у особи Драґена Колєсара три таланти ґлумецки, режисерски, шпивацки и вон шицки три розвива под’єднак так цесно повязани же нє мож розознац дзе єдeн престава, а други почина. През 22 роки професийного анґажману у Сербским народним театру у Новим Садзе, одбавел коло 130 улоги.
Драґен Колєсар витворел и значне число улогох у телевизийних серийох и на филме. Aктивно участвовал у роботи новосадского руского КПД „Максим Горки”, а у Аматерски руским театре „ Дядя“ вон бул присутни 15 роки, дзе поставел 11 театрални фалати. През блїзко 40 роки своєй театралней дїялносци Драґен Колєсар поставел на сцену понад 30 рижни театрални фалати, найвецей з рускима аматерами. Од 1950. наступа як шпивач у Радио станїци Нови Сад зоз репертоаром од коло 200 шпиванки.
Умар у Петроварадину 20. януара, а поховани є 21. януара 1995. року на петроварадинским теметове на Транджаменту.
Културно уметнїцке дружтво у Бачинцох ноши мено „ Драґутин Драґен Колєсар“.
Литература
2. Дюра Латяк „Рускe слове” ч. 18. од 1. мая 1953. року на 3. боку
3. Мария Горняк Пушкаш „Шветлосц” ч. 3/1968, боки 235-236
4. Дюра Латяк, „Шветлосц“ ч. 4/2009, боки 602-611
5. На интернету под меном Драґутин Драґен Колєсар єст коло 10 одреднїци