Позната оперска шпивачка, примадона Сербского народноги театра Ирина Давосир-Матанович  позната и як радио-шпивачки руских, українских и сербских народних писньох

Народзела ше 4. януара 1933. року у Дюрдьове. Уж як школярки другей класи ґимназиї пришол до вираженя єй музични талант. Прето ше уписала до Стреднєй музичней школи у Новим Садзе.

По законченю музичней школи поволана є до опери у Сараєве а у медзичаше ше явела на авдицию и до новосадскей Опери и такой у септембре 1953. року була прията до Сербского народного театра у Новим Садзе. Ту остала аж по пензионованє у януаре 1982. року. Як солистка новосадскей опери госцовала у Беоґрадзе, Заґребе и Любляни, алє и у Болгарскей, Єгипту, Мадярскей и Италиї. Окреме у италиянскей преси достала вельо ласкави оцени за свойо шпиванє.Ирина Давосир-Матанович шпивала зоз оперскима гвиздами як цо то була Радмила Бакочевич и Милка Стоянович.

Найволєла улогу Мими у „Боемох”, алє  ю публика найбаржей запаметала по улоги Лиї у „Турандоту”. Шпивала як Дюла у Ґотовцовей опери „Еро з гевтого швета”, Чо Чо Сан у опери „Мадам Бетерфлай”, потим у оперох „Кавалерия Рустикана”, „Паяци”, „Евґений Онєґин”, „Вертер” и велїх других.

Освоєла трецу награду 1960. року на змаганю младих шпивачох у Будапешту. Достала на дарунок годзинку од предсидателя Йосипа Броза Тита кед у Карадьордєве шпивала по руски на даскельо заводи. Даруюци єй годзинку, гварел: „То је она мала што пјева русински“.

Ирина Давосир-Матанович єдна з руских  найудатнєйших повойнових уметнїкох у обласци музичней култури  котра досягла найвисши професийни уровень примадони  и єдна од познатих интерпретаторох рускей, українскей и сербскей шпиванки як на отвореней сцени, так и у студию Радио Нового Саду.

Умарла 4. марца 2007. року.

Литература

  1. Интерґрални текст под биоґрафску одреднїцу Ирина Давосир Матанович
  2. На интернету мено Ирина Давосир Матанович спомина ше 20 раз, углавним то аудио и видео записи   алє биоґрафских податкох нєт
  3. Дюра Латяк.  Календар 2008,  боки 390-391.
  4. Дюра Латяк: „Глас Союзу“ ч. 10/2007, б 45.
  5. https://nar.org.rs Ирина Давoсир Матанович, Доприношенє Руснацох розвою Нового Саду, аудио сериял , Новинарска асоцияция Руснацох,  продукция 2016