Познати хорски дириґент и композитор

Народзел ше 22. януара 1913. року у Коцуре. Оцец Иван (Янко), мац Мария, дзивоцке презвиско Шандор. Треци є по шоре од штирох братох и шицки штирме були священїки. Основну школу закончел у Коцуре, а ґимназию у Травнику. Филозофию и теолоґию закончел у Риме. Уж под час школованя пришол до вираженя його музични талант, та уж як богослов дириґовал зоз вельким хором українского колеґия у Риме.

За священїка бул пошвецени у Коцуре 2. юния 1938. року, после рукоположеня перше бул капелан у Прняворе (Босна), од 8. юния 1938.  а вец од  10. октобра истого року бул капелан у Руским Керестуре. Ту попри священїцкей длужносци водзел и керестурски мишани хор перше при РНПД (по 6. април 1941. року), а вец при ОГМ (Орґанизациї грекокатолїцкой молодежи) по 1944. рок. Єден час (1942-1944) и режирал театрални фалати керестурским дилетантом, преважно зоз шпиваньом, а водзел и дописовательство ужгородских новинох „Неділя“, у котрих єден бок бул друковани на язику бачванских Руснацох.

По законченю Другей шветовей войни наступел траґични период у живоце Иринея Тимка. Пре отворене нєскладанє зоз большевицку идеолоґию, тедишня локална власц го придала на суд и бул 1947. року  осудзени на 16 роки гарешту, познєйше му зменшане на 10 роки котри одшедзел у Сримскей Митровици. После виходу з гарешту вецей як єден рок бул у Крижевцох, у канцелариї владичества. И там основал и водзел мишани хор и видал и зборнїк церковних композицийох за мишани хор, а вец од найвисших церковних власцох у Риме достал розришенє од священства, врацел ше до Нового Саду. Оженєл ше зоз Амалию Еделински. Тото му помогло зачувац чловеческу присебносц, особне достоїнство и животни оптимизем.

Як над’звичайно образовани чловек, ерудит, цали свой творчи потенциял и роботну енерґию  пошвецел виключно музики. Спочатку робел як инспициєнт Опери Сербского народного театра у Новим Садзе, алє ше и активно уключел до тедишнього нашого новосадского КУД „Максим Горки“, дзе такой основал и мишани хор зоз котрим руководзел по конєц свойого живота. Дзекуюци йому, период 1964-1984 представя „златни период“ хорского шпиваня Русинох у Новим Садзе, алє и у Руским Керестуре и у Баня Луки.

Од 1969. року Ириней преходзи на длужносц редактора рускей народней музики у Радио Новим Садзе, дзе його творчи потенцияли  пришли до вираженя. Ту вон розписує аранжмани за нашо народни писнї, дириґує зоз тамбуровим и народним оркестром под час знїманя наших писньох на маґнетофонску пантлїку и пише замерковани етномузиколоґийни тексти до руских музичних емисийох.

Бул нєзаменлїви у креированю репертоара новостворених композицийох  и текстох, виведзених на Фестивалу „Червена ружа“.

Його дїялносц як композитора ище вше до конца нє спатрена и нє оценєна, и ище вше чека музичного фаховца котри би ше заинтересовал за тоту обласц Тимковей дїялносци.

Умар 8. септембра 1986. року у Новим Садзе, а поховани є на Новим теметове.

Литература

  1. о. Проф. Др Роман Миз: Священїки дакедишнього Осєцкого викарията; видавателє: Парохия св. Петра и Павла, Нови Сад и „Максима“ друкарня и видавательна хижа, Петроварадин, 2016, б. 310-311.
  2. „Шветлосц“ ч. 1/2003, б.95-98.