Учитель и културни дїяч медзи бачванскима Русинами

Народзел ше у валалє Вирава (срез Гумене, Словацка) 20. (або 21) новембра 1866. Року. Умар у Будапешту 4. януара 1923. року и там є поховани. Дияко-учительску школу закончел у Ужгородзе 1887. року, а перше место службованя му було Чемерно у восточней Словацкей. Там ше затримал лєм єден рок. Од єшенї 1889. року вон уж учителює у Руским Керестуре. Ту пошвидко приходзи до зраженя зоз своїма колеґами и крижевски владика Юлий Дрогобецки го премесцує до Старого Вербасу. Алє, Врабель и там приходзи до зраженя зоз тамтейшим парохом Михайлом Трбоєвичом, котри з рочного церковного приходу перше себе вжал плацу,а Врабельови нє остало анї на голи живот. Прето ше на кратко знова враца до Керестура и ту ше женї зоз дзивку керестурского учителя Михала Джунї тиж учительку Павлу (Павлину) Джуньову. З намиру же би Врабеля затримал, Дрогобецки го премесцує до Нового Саду, алє Врабель анї там нє нашол мир. Повадзел ше зоз новосадским грекокатолїцким парохом Йованом Храниловичом, бо ше нє мог помириц зоз ровнодушносцу тутейшого священства и интелиґенциї у поглядзе националного препаданя Руснацох на тих просторох. Прето пришло аж и до суду медзи нїм и новосадским парохом. Тот суд достал Врабель, алє источасно прилапел поволанку зоз Будапешту и у маю 1898. року Министерство польодїлства тедишнєй угорскей влади го менує за главного редактора господарских новинох „Недїля“.

Под час службованя у Руским Керестуре сотрудзовал з вецей публикациями на карпаторуским и мадярским язику. Найвецей  писал о живоце Руснацох у Бачкей и обявйовал у мадярских новинох  „Kelet“ („Восток“), у львовским часопису „Листок“, у ужгородским „Місяцослову“ и львовскей „Науки“.

За нашу културу є найзначнєйши прето же перши, з материялну помоцу наших людзох зоз Керестура и Коцура, позберал и видал нашо народни шпиванки под насловом „Русскій соловей“ 1890. року у Ужгородзе.

Литература

 Дюра Папгаргаї: Заобидзени драгокази Михайла Врабеля, „Шветлосц“ ч- 2/1968, б. 81-88-

  1. Юлиян Тамаш: Врабельов „Русскій соловей“ и його поетове, „Литературне слово“ ч. 9/1980, б. 5-6.
  2. Дюра Варґа: Здогадованє на Михайла Врабеля. „Шветлосц“ ч. 2/1990, б 207-212.
  3. Дюра Латяк: Михайло Врабель учитель и културни дїяч медзи бачванскима Русинами, „Studia Ruthenica“  22/ 2017, б. 61-67.