Визначни шахиста, майсторски кандидат и шаховски судия

Кед слово о шаху медзи Руснацами, Микола Кучмаш забера найвисше место медзи численима учашнїками у тим спорту. Микола Кучмаш народзени 25. юлия 1936. року у Коцуре. По законченю седеморочней школи у родним месце, закончел Стредню ветеринарску школу у Шабцу (1954.) и Висшу педаґоґийну школу на Цетиню ґрупа ґеоґрафия­история.  Шах почал бавиц пейдзешатих рокох прешлого вику кед мал 13–14 роки. Член коцурского Клуба „Омладинєц” постава 1952. року. Два партиї окреме памета – найкрадшу, хтору достал за 10 минути, и найдлугшу, хтора тирвала вецей як 9 годзини.

Зоз своїм ентузиязмом и любову ґу шаху, Кучмаш у Коцуре  и других наших местох прицагнул вельо валалчанох же би бавели шах. Од 1952. року одбавел  вецей як 2 500 партиї у стандардним, швидкоцагаюцим и дописним шаху.

Найвецей бавел за Войводину (388) и Омладинєц (215). Попри тим, наступал и за новосадски клуби – Партизан, ШК „Руске слово”, Бубамара и ҐРАС, та и за керестурски Русин. Вкупно за клуби одбавел 725 партиї у стандардним шаху. Найлєпши резултати мал на Роботнїцким першенстве Нового Саду 1976. и 1977. року, кед завжал треци места. Престал бавиц шах 1981.Здобул рейтинґ майсторского кандидата.

У иножемстве на медзинародних турнирох наступал на 25 турнирох, найвецей у бувшей Чехословацкей, Польскей, Болгарскей и Румуниї.

Бул шаховски судия на трох Олимпиядох. У Дубаию 1986,. Новим Садзе 1990. року, и у  Єревану 1996. року.

Бул судия и на числених европских першенствох за кадетки и омладинки.

 Литература

  1.  интеґрални текст за биоґрафску одреднїцу Микола Кучмаш
  2. https://solair.eunet.rs/~MEDJESIA/Fizicka%20kultura%20i%20sport.htm
  3. https://groups.yahoo.com/neo/groups/SAH-MAT_LISTA/conversations/messages/1645
  4. https://issuu.com/ruskeslovo2015/docs/ruskeslovo44_b57958c13236ca