Новосадски грекокатолїцки парох, новинар, писатель и дружтвени дїяч

Народзел ше 18. децембра 1855. року у Кричкох. До основней школи почал ходзиц у Сошицох, алє по оцовей шмерци (1864) мац ше преселєла до Крижевцох и Йован там предлужел школованє. Уж як школяр шестей класи ґимназиї почал ше интересовац за поезию и упознал ше зоз писателями Антом Ковачичом и Авґустом Шеноом.

Перши рок богословцких студийох закончел у Заґребе, а вец прешол до Бечу, дзе попри богословиї слухал и преподаваня познатого слависти Миклошича и филозофа Бретана.

За священїка бул пошвецени 1878. року. После службованя у вецей местох у Жумберку, дзе пре свою дружтвену дїялносц священїцки обовязки тримал як другозначни, тедишнї крижевски владика Илия Хранилович (котрому бул и родзина) го послал за капелана до Коцура (1886), после до Керестура (по 1889), одкаль у авґусту 1889. року постал грекокатолїцки  парох у Новим Садзе.

И у Новим Садзе йому дружтвена активносц була на першим месце. Здобул вельки угляд медзи новосадску интелиґенцию, та єден час бул и предсидатель новинарскей орґанизациї и редактор демократских новинох „Єдинство“. Дня 25. новембра 1918. року предшедовал Велькей народней скупштини у Новим Садзе, на котрей принєшена одлука о присоєдинєню Войводини до Сербиї и до составу новоствореней держави Кральовини Сербох, Горватох и Словенцох.

За войводянских Руснацох Йован Хранилович значни и прето же мал приятельски одношеня зоз тедишнїм дюрдьовским парохом о. Дюром Биндасом, на чию молбу ше Хранилович анґажовал коло обезпечованя потребних условийох за отримованє Сновательней схадзки Руского народного просвитного дружтва у Новим Садзе 1919. року. Ту вон обезпечел потребни дозволи од тедишнїх власцох, обеспечел змесценє делеґатох и обеспечел святочну салу Новосадского маґистрата за отримованє зашеданя. На предлог о. Дюри Биндаса Хранилович и предшедовал на Сновательней схадзки Руского народного просвитного дружтва 2. юлия 1919. року.

Умар у Новим Садзе 5. авґуста 1924. року. Поховани є на новосадским руским теметове. Його памятнїк у форми обелиска, котри подзвигла новинарска орґанизация, нєшка под защиту держави.

 Литература

  1. Интеґрални текст за биоґрафску одреднїцу Йован Хранилович
  2. о. Проф. Др Роман Миз: Священїки дакедишнього Осєцкого викарията; видавателє: Парохия св. Петра и Павла, Нови Сад и „Максима“ друкарня и видавательна хижа, Петроварадин, 2016, б. 329-332.
  3. На интернету ше мено Йован Хранилович зявює на вецей як 17 бокох.
  4. Владимир Барович,Соня Подкозарац, Йован Хранилович-портрет забутого новинара и литературного критичара, Фабрика знаня и очуваня, Нови Сад, 2015.