Основоположнїк уметнїцкей литератури и литературного язика Руснацох у Бачкей, Сриме и Славониї, наш найугляднєйши интелектуалєц у першей половки 20. вику.
Народзел ше у Руским Керестуре 15. юния 1886. року, у стреднє маєтней парастскей фамилиї. Шейсц класи основней школи закончує у Керестуре, а ґимназию у Винковцох и Заґребе. На Теолоґийни факултет у Заґребе уписал ше 1906. року, а 1907. року преходзи на богословию до Львова и закончує ю 1911. року. Последипломски студиї закончел у Швайцарскей дзе одбранєл 1913. року докторску дисертацию зоз философиї „De principiis cognitionis fundamentalibus Leopoli, 1913“ (О основних началох спознаня).
За священїка бул пошвецени 1913. року.
Як школяр ґимназиї у Заґребе почал писац перши свойо писнї. Концом 1903. року закончел идилски венєц „З мойого валала“ котри видруковани у України 1904. року. То источасно и перша кнїжка уметнїцкей литератури на бешеди бачванско-сримских Руснацох.
Писнї писал и по горватски.
Пре нєсиґурни войново обставини у Львове 1915. року 9 мешаци пребувал у Руским Керестуре. За тото час написал хронїку керестурскей парохиї под назву „Liber memorabilium гр. кат. Парохиї Бачкерестурскей“, котра ше велї роки чувала лєм як рукопис.
И после врацаня до Львова Костельник отримовал цесну вязу зоз родимим крайом и помагал му коло активносцох у вязи зоз националним препородом. Єден час бул и редактор львовского вирского часопису „Нива“, а написал и даскельо кнїжки по українски, медзи котрима збирку писньох под насловом „Помершій донечці“ (1921) и „Пісня Богові“ (1922), котру тримал за свой архитвор у литератури. Обидва кнїжки у прекладу на наш литературни язик обявело „Руске слово“.
После снованя Руского народного просвитного дружтва (1919) Костельник цесно сотрудзує зоз його предсидательом керестурским парохом о. Михайлом Мудрим и подпредсидательом и редактором Календара о. Дюром Биндасом. На їх молбу написал „Ґраматику бачваньско-рускей бешеди“(Сримски Карловци, 1923), а вец и першу драму на нашей бешеди под насловом „Ґу Христови“ (1923), потим драму „Єфтайова дзивка“ (1924). Кед 1924. року почали виходзиц „Руски новини“, вон и у нїх часто обявйовал свойо написи и литературни твори. Найвецей писал по українски и свойо твори обявйовал у Львове у рижних публикацийох або окремних виданьох.
У историї рускей литератури и култури забера перше место як утемелїтель нашого литературного язика и основоположнїк нашей уметнїцкей литератури.
Заштрелєни є у Львове 20. септембра 1948. року.
Литература
- Интеґрални текст за биоґрафску одреднїцу Гавриїл Костельник
- Др Юлиян Тамаш: История рускей литератури, Завод за учебнїки и наставни средства, Београд, 1997, б. 547-559.
- О. Проф. Др Роман Миз: Священїки дакедишнього Осєцкого викарията, видавателє: Парохия св. Петра и Павла, Нови Сад и „Максима“, друкарня и видавательна хижа, Петроварадин, 2016, б. 187-190.
- Юлиян Тамаш: Гавриїл Костельник медзи доктрину и природу, студия; „Руске слово“ Н. Сад, 1986.