Инициятор и перши предсидатель Союзу руских школярох (СРШ), священїк и писатель.

Народзел ше у Новим Вербаше 10. юния 1904. року, але його родичи, оцец Теодор и мац Юлияна, (нар. Радвански) бивали у Коцуре. Окрем Максимилияна (Максима), мали ище єдну дзивку и трох синох. Понеже були худобни, Максимилиян уж на свойо 10 роки мушел пойсц през лєто служиц. Бул добри школяр и тедишнї коцурски катехет и капелан Юрий (Дюра) Павич го предложел владикови др Дионизийови Нярадийови же би го приял до семинариї на безплатне школованє.Школовал ше у интернату Бенедиктанцох у Фолдерсу при городу Гал, 13 километри оддалєного од Инсбруку (Тирол). Закончел пейц класи ґимназиї, исусовацку ґимназию у Травнику. Студирал богословию у  Заґребу и  Львове .За священїка є рукоположени 31. марца 1929. року у Заґребе.

Службовал у Драґох (Жумберак) Липовлянох (при Загребе) а предлужує у  Коцуре. Од 31. авґуста 1945. року водзел парохию у Новим Садзе скоро полни 23 роки. У половки юлия 1968. року ше поцагнул до пензиї. И надалєй остал жиц у Новим Садзе, дзе и умар 23. новембра 1993. року. Поховани є на Новим теметове.

Як ґимназиялєц почал писац писнї, а познєйше и приповедки. Свойо твори обявйовал у Руских новинох и Руским календаре. На предлог подпредсидателя РНПД , Дюри Биндаса, Максимилиян Буила иницировал и орґанизовал Сновательну схадзку студентох и стредньошколцох рускей народносци, на котрей принєшена одлука о снованю Союзу руских школярох (СРШ), чиї бул перши предсидатель.

Литература

  1.  о. Проф. Др Роман Миз: Священїки дакедишнього Осєцкого викарията; видавателє: Парохия св. Петра и Павла, Нови Сад и „Максима“ друкарня и видавательна хижа, Петроварадин, 2016, б. 75-81.
  2. др Юлиян Тамаш: История рускей литератури; Завод за учебнїки и наставни средства, Београд, 1997, б. 105-106 и 511-512.