Перши школовани дзияко-учитель у Руским Керестуре, чийо школяре постали ношителє националного препороду Руснацох на южнославянских просторох

Народзел ше у валалє Фолварк (нєшка Страняни, Словацка) 1816. року. Оцец му бул приучени дзияк, а у тим му помагал и син Петро, котри основну школу закончел у родним Фолварку. Школованє предлужел у Ужгородзе, дзе здобул званє дзиякоучителя и писара. Попри педаґоґийних предметох вон нащивйовал и годзини хорского шпиваня.

Першу службу достал у месце Шамброн.Зоз фамелию ше 1854.  року приселєл до Керестура и ту 38 роки бул учитель и дзияк  по конєц роботного вику (1892). Жителє  Руского Керестура го барз почитовали бо воспитал вельо ґенерациї школярох. Велї з нїх постали високо образовани людзе, як цо то крижевски владика др Дионизий Няради, керестурски парох о. Михайло Мудри, коцурски парох о. Дюра Биндас, др Гавриїл Костельник, о. Димитрий Надь, учителька Наталия Джуня, учителє Осиф Фа, Михайло Няради, инженєр Дюра Пап, адвокат др Михал Гайнал и велї други, котри перше свойо знанє здобули од учителя Петра Кузмяка. Праве вони були тоти котри винєсли на своїх плєцох национални и културни препород Руснацох у Бачкей, Сриме и Славониї.

Mено Петра Кузмяка ноши керестурска школа, пред котру стої биста того учителя (автор Силвестер Макаї, коцурски наставнїк, маляр и скулптор). И єдна улїца у валалє ноши його мено. Повойново виселєнци з Руского Керестура у Новим Орахове (при Бачкей Тополї) свойо културно-уметнїцке дружтво наволали „Петро Кузмяк“.

Литература

  1.  Дюра Варґа, Петро Кузмяк, учитель, културни роботнїк, поет (1816-1900), „Шветлосц“, часопис за литературу, културу и дружтвени питаня, рок ХХІ, марец-април 1983, число 2, „Р уске слово“, Нови Сад, 1983, б. 165-166.
  2. М. А. Поливка: История народней школи у Руским Керетуре; Руски календар 1933, б. 105-114.
  3. 3. Надь: О Петрови Кузмякови, Руски народни календар 1949, б. 145-147.

4. Янко Рамач: Школа у Руским Керестуре (1753-1918); видала Грекокатолїцка парохия св. Петра и Павла, Н. Сад,1995.

5. Др Юлиян Тамаш: История рускей литератури; Завод за уџбенике и наставна средства, Београд, 1997, б. 571-572.

6. Дюра Латяк: Петро Кузмяк – керестурски шлїди и памятки на ньго;„Шветлосц“ ч. 6/1991, б 40-47.