Найпознатши театрални дїяч при Руснацох у Бачкей и наставнїк у першей рускей ґимназиї у Руским Керестуре

Народзел ше 28. априла 1890. року у билоруским месце Браслав, дзе його оцец бул  економ на єдним спахийским маєтку. Основну школу и ґимназию закончел у українским варощику Бучач. По законченю ґимназиї Ризнич ше уписал на Медицински факултет у Львове, дзе закончел осем семестри.  Под час студийох у Львове Ризнич закончує шейсцмешачни курс уметнїцкей школи 1913. Добре упознал живот и дїло Константина Станиславского, чию уметнїцку  филозофию  шлїдзел до конца свойого живота.

Перша шветова война и револуцийни превреваня у царскей Русия 1917-1919. року Ризнича застали на боку меньшевикох. Як такого, зарабровали го  билоґардийци, дзе як интелектуалєц мал шлєбодни статус зоз котрим сцигнул до Дубровнику, городу  котри Ризничово предки твердзе же водза свойо коренї. Но у Дубровнику и околних местох нє нашол свойо дальши родзини зоз презвиском Ризнич.Зоз єдну ґрупу своїх колеґох емиґрантох застановел ше у Вербаше и  оженєл ше зоз учительку Цецилию Шантову. У медзичаше абсолвовал на Правним факултету у Суботици, а од 1945. по пензионованє 1958. року жил и робел у Руским Керестуре, дзе викладал росийски язик, мальованє и ручну роботу, а шлєбодни час пошвецел театралному аматеризму.

У керестурскей ґимназиї  зоз школярами у позашколскей активносци пририхтовал театрални представи. На його власне жаданє колеґове и театрални аматере го ословйовали зоз росийским назвиском „дядя“ (по сербски ујак-ујко а по нашим бачи).

Кед 1945. року основана Руска матка, Ризнич у єй рамикох бул задлужени за унапредзенє театралного аматеризма. Отримовал кратши семинари за будуцих аматерских режисерох и ґлумцох зоз шицких руских местох. У Коцуре, Керестуре и Вербаше з рускима аматерами поставел на сцену 51 театрални фалат а источашнє на сербскей бешеди  у Вербаше и Кули  поставел значне число театралних фалатох и виховал цалу плеяду глумцох-аматерох. Свою режисерску кариєру закончел у Руским Керестуре 1966. року. Умар 12. фебруара 1966. року.Поховани є на вербаским теметове.

Йому на чесц од 1969. року у Руским Керестуре ше отримує Драмски мемориял, наволани з меном „Петро Ризнич Дядя“. Таке исте мено ноши и Руски народни театер у Руским Керестуре.

Литература

  1.  Интеґрални текст под биоґрафску одреднїцу Петро Ризнич Дядя
  2. Дюра Латяк: Театрални живот Руснацох І часц, Театрални музей Войводини и НВУ Руске слово, 2008, б. 282-290..
  3. Трицец драмски  меморияли  Петра  Ризнича  Дядї (  1969-1998),     хронолоґия;    видал Дом култури Руски Керестур, 1998, статя Дюри Папгаргаї: Жил за театер, б. 5-32.
  4. „Шветлосц“ ч. 4/1990, б. 515-549
  5. Дюра Латяк: Двацецпейц роки АРТ–РНТ „Дядя“ (1970-1995), Нови Сад, 1995, б. 7-34.
  6. Mено Петро Ризич Дядя ше на интрнету зявює прейґ 25 раз.