Авторки у рускей литератури

Проєкт „Aвторки у рускей литератури“ Новинарска асоцияция Руснацох (НАР) реализовала з потримовку Покраїнского секретарията за образованє, предписаня, управу и национални меншини–национални заєднїци, прейґ Конкурса за дотациї орґанизацийом етнїчних заєднїцох за 2018 рок.

Циль проєкта афирмованє и стимулованє литературней творчосци младих женох на руским язику, та прето з тим проєктом облапени млади поетеси, хтори пишу на руским язику, народзени после 1985. року и младши. Тиж так, циль проєкта промововац їх творчосц на културней сцени Войводини.

З проєктом облапени 9 млади поетеси з Войводини, хтори пишу на руским литературним язику.

Проєкт, попри членох проєктного тима НАР, реализовала професорка руского язика и литератури Ася Папуґа, иншак поетеса и новинарка, хтора обезпечела и систематизовала материял за обявйованє.

Резултат проєкта електронска кнїжка на руским язику, поставена на интернет сайт НАР, у хторей обявени позберани биоґрафиї з библиоґрафскима податками и портретами поетесох и, цо найважнєйше, часц творчосци младих поетесох.

Биоґрафиї младих поетесох и вибор їх писньох обєдинєно буду обявени на єдним месце, як сепарат-тема,у Часопису за литературу, културу и уметносц „Шветлосц“ (Светлост), хтори на руским язику видава Новинско–видавательна установа „Руске слово“ з Нового Саду.