Українски етнолоґ, записовач усного народного скарбу, публицист, язикознавец и културни дїяч
Народзел ше 9. мая 1871. року у галицким валалє Велеснїв (Україна), у худобней селянскей фамилиї.Умар у Львове 6. октобра 1926. и там є поховани. Перши два класи основней школи закончел у валалу Плужники а трецу и штварту класу закончел у срезким месце Бучачу. Ту започал ходзиц и до ґимназиї, алє ю закончел у Станиславове (нєшка Ивано-Франкивск), а студиї на Универзитету у Львове.
Ище як студент другого року почал ше занїмац зоз зазберованьом усного народного скарбу. У юнию 1897. року припутовал до Керестура, а вец и до Коцуре и Нового Саду. За нєполни три мешаци вон од наших предкох у Керестуре и Коцуре записал 430 народни шпиванки и 220 прозни твори, а попри тим детально описал керестурску свадзбу, обявел Керестурску хронїку и обсяжну статю з насловом „Руски населєня у Бачкей“.У тексту „Поетични талант медзи бачванскикма Русинами“ рецензовал Костельников идилски венєц „З мойого валала“ и написал даскельо полемични написи у вязи зоз националним идентитетом бачванско-сримских Руснацох.
Шицки спомнути записи и статї обявел у штирох томох Етноґрафичного зборнїка Наукового товариства „Шевченко“ у Львове у периодзе од 1897. по 1911. рок. Шицки штири томи Новинско-видавательне подприємство „Руске слово“ фототипски превидало у периодзе 1985-1986. Ґу тим виданьом доложени 1988. року и пияти том до котрого позберани Гнатюково розправи и статї о Русинох Бачкей, Срима и Славониї.
Гнатюково записи нашого усного народного скарбу представяю фундамент на котрим стої история литератури бачванско-сримских Руснацох.
Литература:
- Народни приповедки бачваньских Русинох (вибрал и до друку приготовел Дюра Латяк), „Руске слово“ Руски Керестур, 1967.
- Руски народни писнї (зредаґовал и до друку приготовел Дюра Латяк), „Руске слово“ Н. Сад, 1972.
- М. Мушинка: Листування Г. Костельника з В. Гнатюком, „Шветлосц“ ч. 3/1967.