Учитель и драмски дїяч у Коцуре, други подпредсидатель Управного одбору Руского народного просвитного дружтва (РНПД)
Народзел ше 25. фебруара 1875. року у Коцуре. Основну школу закончел у своїм валалє, нїзшу ґимназию у Новим Садзе, а дзиякоучительску у Ужгородзе. У дзепоєдних жридлох (як замерковал Микола М. Цап), учительску школу закончел у Баї (Мадярска). Алє, понеже добре овладал зоз карпаторуским язиком, на котрим и писал, а бул и дзияк, точнєйше будзе же бул ужгородски школяр.
У Коцуре робел як учитель од 1894. по 1899. рок. По власней дзеки одходзи до грекокатолїцкей основней школи (познатшей як „Руска школа“) у Новим Садзе. Ту робел по 1912. рок, и знова ше врацел до Коцура дзе роби як учитель и дзияк.
Под час школованя здобул солидне музичне образованє котре зоз замеркованим успихом применьовал у своєй културно-просвитней дїялносци. Вон 23. фебруара 1913. року пририхтал „Забаву“ у котрей одбавени два єднодїйки у його режиї, а виведли их коцурски школяре висших класох основней школи. То источасно и перши театрални представи при Руснацох у Бачкей, о котрих иснує писани шлїд.
После Першей шветовей войни, гоч уж обачлїво хори, Ґубаш предлужує културну дїялносц. Повязал ше зоз о. Дюром Биндасом и потримовал його инициятиви коло снованя рускей културней орґанизациї. З його анґажованьом 9. януара 1919. року у Коцуре основани Просвитни одбор (перши спомедзи вецей таких целох по других местох), а вон вибрани за його першого предсидателя. На Сновательней схадзки Руского народного просвитного дружтва 2. юлия 1919. року у Новим Садзе вибрани є за другого подпредсидателя Управного одбору РНПД-а и на тей длужносци го застала нєсподзивана шмерц.
Умар 3. септембра 1919. року у Коцуре, дзе є и поховани.
Литература
- Дюра Латяк: Театрални живот Руснацох, І часц, видавателє: Театрални музей Войводини и НВУ „Руске слово“, Нови Сад, 2008, б. 274-276.