Новинарка, писателька и литературна критичарка

Ирина ( дзивоцке Гарди) Ковачевич народзена  17. септембра 1944. року у Руским Керестуре. На Филозофским факултету у Новим Садзе дипломовала 1974. року югославянску литературу. У новинох  „Руске слово“ робела як новинарка,  ушорйовала и литературни додаток “Литературне  слово”, була помоцнїца  и главна и одвичательна редакторка младежского  часописа MAK. За главну и одвичательну редакторку новинох “Руске слово“ менована 1983. року. У маю 1987. преходзи робиц до новинох „Дневник“ дзе була редакторка рубрики за културу,  а по пензионованє шлєбодна репортерка. Єден мандат була членїца Главного одбору Союзу новинарох Югославиї, а два мандати предсидателька Дружтва новинарох Войводини, од 1985-1987. рок.

Заступена є у вецей антолоґийох. Писнї єй прекладани на сербски, словенацки, македонски, италиянски, мадярски, словацки, албански и румунски язик.

Авторка є кнїжкох: “На дланї заренко”, писнї, 1969, “Тисяч радосци” , писнї за дзеци 1976, “Безмена ява”, писнї 1980, “Бависка”, писнї за дзеци, 1984. “Куцик мудросци”, писнї за дзеци 1987, “Єднозложност”, писнї, 2004. року,  “Дванац сказки”, проза за дзеци, 2007, “Нєбо над Керестуром”, 2012. ,  вибора поезиї за дзеци “Котульки и ґомбульки”. По сербски у виданю Народней библиотеки Нови Сад обявела збирку приповедкох под назву “Скаске”, 2009. року. Написала и документарну радио драму “Кридла за Ангела”, штири монодрами за сцену, : “Наша Ирин”,  “Левоново войни”,  “Милионерка”,  “Перша змена”. Ауторка є дуодрамох “Брадавкa” и “Блїзкосц” и малей сценскей форми  “Оштри угел” як и драми “Квартель”. Прешпивала з македонского на руски язик Антологию македонскей поезиї.

Обявела понад двасто прикази, рецензиї и анализи литературних дїлох, або цалих опусох руских авторох и културних зявеньох. Найвекша часц з тих роботох вошла до кнїжки котру видало “Руске слово” з нагоди  70 рокох єй живота, под назву “Галов”, 2014.

Од припoзнаньoх котри достала найзначнєйши “Искри култури”, Културно-просвитней заєднїци Войводини, “Златне пирко”, Дружтва новинарх Войводини и Медзинародна награда за руску литературу “Александар Духнович”.

Жиє и роби у Новим Садзе.

Литература

  1. Антология рускей поезиї, Руски Керстур” 1965.
  2. Савремена поезија за децу у Војводини” Новио Сад 1974.
  3. Ј. Тамаш. “Булке са усана”, Нови Сад 1977.
  4. Г. Арсовски: “Блескот на рамнината” Битола, 1975.
  5. Ј. Тамаш: “Даљина бди” (на мадярским язику), Нови Сад 1984.
  6. М. Настасијевић “Између стрњике асфалтни сјај”, Ириг, 1984.
  7. Дю. Папгаргаї: Антолоґия рускей поезї, Нови Сад  1984.
  8. И. Г. Ковачевич: “Хмара на верх тополї”, Нови Сад 1990.
  9. О. Шијачки “Очи равнице” 1998 Нови Сад.
  10. В. Кочиш: Антологија поезије војвођанских Русина “Жута причест”, Смедерево, 2003.
  11. П. Трохановски: “Мамко, куп ми книжку”, Нови Сац (Польска) 1995.
  12. Ю. Тамаш: Антология рускей поезиї “Ошлєпени соловей”, Нови Сад, 2005.
  13. На интернету ше мено Ирина Гарди Ковачевиг зявює на вецей як дзешец бокох
  14. Сериял радио емисийох  “Доприношенє Руснацох розвою Нового Саду“, nar.org.rs