Лидия Рамач ше народзела 26. януара 1965. року у Руским Керестуре, а школовала ше у Новим Садзе, дзе после основней школи закончела Стредню школу за дизайн „Боґдан Шупут”, напрям дизайн текстила, 1983. року. На Факултету за наравнословє и технолоґию Универзитета у Любляни дипломовала дизайнованє текстила 1994. року. У Словениї була анґажована як костимоґраф и асистентка костимоґрафа познатей Мети Хочевар, у Любляни, Целю, Єсеницох и у Австриї у Клаґенфурту, робела и за телевизию, на рекламох и за филм, и за познату люблянску фирму штриканей конфекциї Плетенина дзе дизайновала саямску колекцию.
Окремне припознаня достала за реализованє идейного ришеня плаката за Модну ревию студентох дизайнованя текстила и облєканя ФНТ у Любляни у Цанкаровим доме у Любляни 1987. року.
До Нового Саду ше врацела 1997. року и достала роботу у копаниї АД Новитет як водзаци креатор, дзе водзела креативни тим хтори обдумовйовал колекциї облєчива од скицированя през технолоґию виробку по законченє и презентованє през тарґовински мрежи. Робела костими и за представи АРТ Дядя Важне волац ше Ернест, и Єфтайова дзивка, як и РКЦ у Новим Садзе за представу Чайка Джонатан Ливинґстон.
За члена Здруженя подобових уметнїкох применєних уметносцох и дизайнерох Войводини УПИДИВ до секциї текстил прията є 1998. року, а у статусу шлєбодного уметнїка є од 2017. року.
Свойо роботи континуована виклада на колективних виставох Здруженя, а и самостойно, а за нїх часто достава припознаня, як цо то 2019. року Златна форма за дизайн, и истого року окремне припознанє ФОРМИ 23 за доприношенє роботи УПИДИВ у обласци викладацкей дїялносци.
Контакт꞉ lidija.ramac@gmail.com