Мелания Надь (дзивоцке Хромиш) фармацеут, специялиста медицинскй биохемиї, примариюс, народзена 17. юния 1938. року. Основну школу и нїзшу ґимназию закончела у Руским Керестуре на мацеринским язику, а висшу ґимназию у Оджаку 1956. року. Фармацеутски факултет закончела у Беоґраду 1961. року, а Специялистични испит зоз медицинскей биохемиї положела 1967. року на Институту за Медицинску биохемию Фармацеутского факултета у Беоґрадзе. Окремна специялносц була єй одредзованє хормонох и метаболитох у тїлесних чечносцох (катехоламини и стероиди). Званє примариюса достала 1981. року.
Єй професийна драга почала зоз приправнїцким стажом у Народней апатики у Сенти и Общим шпиталю у Вербасу. Фахови испит положела 1962. у Беоґраду. Же би ше пририхтала за лабораторийну роботу у Общим шпиталю Вербас под час приправнїцкого стажу, 5 мешаци робела у лабораториї Интерне “Б” Клинїки у Беоґраду. Од априла мешаца 1962. року робела як шеф Клинїчней лабораториї Общого шпиталю у Вербаше.
Специялистични стаж робела у Клинїчним лабораториюму Клинїчного шпиталю у Новим Садзе, и у лабораторийох Медицинского факултета у Беоґрадзе. Специялистичну роботу „Значносц одредзованя холестерола, холестеролских естрох и кортикостероидох при розличних станьох” робела на Институту за биохемию Фармацеутского факултета у Беоґрадзе, дзе 1. юлия 1967. року положела специялистични испит.
По законченю специялизациї предлужела робиц у лабораториї, у тедишнї час у новоформованим Медицинским центру у Вербаше, перше як специялиста биохемичар, а познєйше як началнїца лабораторийней служби Медицинского центра. Року 1970. преходзи до Клинїчного лабораториюма Клинїчного шпиталю у Новим Садзе. Ту робела як специялиста биохемичар, а од 1973. року находзи ше на длужносци шефа Одсека за анализи хормонох.
У едукациї медицинских кадрох участвовала през обучованє специялизантох зоз медицинскей биохемиї школярох зоз Штреднєй медицинскей школи, напрям лабораторийски технїчар. У школским 1977/1978. року участвовала у унапряменей настави як викладач зоз медицинскей биохемиї у штредньошколским Медицинским центру „7. Април” у Новим Садзе. Участвовала у отримованю вежбох зоз предмета Патолоґийна физиолоґия на Медицинским факултету у Новим Садзе.
Узша обласц за котру ше опредзелєла була ендокринолоґийна лабораторийна дияґностика – одредзованє стероидних хормонох у креви и метаболитох у мочу. За фахове усовершованє зоз тей обласци хасновала стипендию страних владох и фондацийох, од Републики Чехословацкей достала стипендию 1974. року, прейґ Комитета за одношеня зоз иножемством. У тим чаше робела и учела на Лабораториї за ендокринолоґию и метаболизем Медицинского факултета у Праги при професорови Хорват Јозефови. Тиж так робела и у Експерименталним ендокринолоґийним институту у Братислави и у других ендокринолоґийних лабораторийох. Писала фахово роботи котри були обявйовани у референтих часописох.
Була член Социялистичного союзу и Союзу синдикатох. У Вербаше була одборнїк Општинскей здравственей ради, член Совиту Медицинского центру у двох мандатох, Секретар синдиката Клинїчного шпиталю у Новим Садзе, член Конференциї Союзу Войводини, предсидателька Совита и предсидателька Синдикату ОУР-а Клинїчного лабораториюма. Тиж так була член Комисиї за Специялизациї и други способи фахового усовершованя Медицинского факултета у Новим Садзе.
Була предсидателька Секциї медицинских биохемичарох Фармацеутского дружтва Войводини, член Вивершного одбору Дружтва медицинских биохемичарох Югославиї, член Комисиї за СИ номенклатуру.
Року 2001. пошла до заслуженей пензиї. Свойо пензионерски днї препровадзовала у Новим Саду. Була анґажована длугши час у Поликлинїки „Папович” за обласц медицинскей биохемиї. Тиж так занїмала ше и зоз гуманитарну роботу, була анґажована у Екуменскей гуманитарней орґанизациї, дзе єден час була и на функциї секретара.
Зоз окремну увагу и любову занїмала ше зоз школованьом младших членох своєй фамелиї. Давала вельку потримовку, совити, средства за школованє. Участвовала и помагала вишколовац двох маґистрох фармациї, єдного дохтора специялисти анестезиолоґа, двох мастер инжинєрох, а наймладши закончує студиї.
Умарла у Новим Садзе 5. новембра 2021. року.