Михал Лїкар народзел ше 8. септембра 1954. року у Дюрдьове. Ту закончел и осем класи основней школи, а вец ше уписал до Машинскей школи у Жаблю.
Кед постал полнолїтни, музика постала його основна животна преокупация. Постал член тамбурового оркестра у КУД „ Тарас Шевченко“. Пошвидко ше и нотално описменєл и здобул стабилнєйшу основу за дальше индивидуалне усовершованє.
Уж на початку осемдзешатих рокох почал и компоновац, кед му було 28 роки. Од того часу вон ше почал занїмац и зоз музичну педаґоґию. Основал при КУД „Тарас Шевченко“ дзецински оркестер, з котрого настало значне число дюрдьовских тамбурашох.
Михал Лїкар ше нє застановел лєм на ученю нових музичарох и складаню нових шпиванкох, алє ше опробовал и у розписованю аранжманох за тамбурово оркестри. По його аранжманох тамбурови оркестер РТВ Нови Сад на „Ружовей заградки“ вецей роки виводзел нови композициї з рускима виводзачами.
Року 1983. явно презентовал свою творчосц на Фестивалу рускей култури „Червена Ружа“ зоз шпиванку „Одайце ме мамо“. Компоновал вецей як 50 руски шпиванки.
Михал Лїкар умар 27. септембра 2021. року у Дюрдьове.