Юлиян Рамач Чамо народзел ше 21. децембра 1963. року у Руским Керестуре. Основну школу закончел у своїм валалє, а Стредню музичну школу „Исидор Баїч“ (оддїл музични сотруднїк) у Новим Садзе. После законченя стреднєй школи уписал ше на Академию уметносцох у Новим Садзе дзе одслухал три семестри и претаргнул студиї, и 1986. року почал робиц у Доме култури у Руским Керестуре як музични сотруднїк и корепетитор. Попри тим, вон вецей роки пририхтовал музични точки у вецей руских културно-уметнїцких дружтвох зоз тамтейшима аматерами, або бул и корепетитор у пририхтованю нових хореоґрафийох.
Под час роботи у Доме култури у Руским Керестуре зоз замеркованим успихом водзел дзивоцки хор, мишани хор, жридлову шпивацку ґрупу (хлопску и женску), парохиялни хлопски хор Церкви св. о. Миколая у Руским Керестуре, тамбурови оркестер керестурского Дому култури и вельки народни оркестер Дому култури. Тиж так, пририхтовал и дзецински вокални ґрупи.
На Фестивалу „Червена ружа“ вецей як два децениї бул член и дириґент провадзацого оркестра на манифестациї „Червене пупче“, або член даєдного зоз спомнутих оркестрох, та и дириґент, на змагательней часци шпивачох Фестивала „Червена ружа“.
Юлиян Рамач Чамо бул и плодни композитор и аранжер. Розписовал аранжмани нє лєм за свойо композициї, алє и за композициї других авторох, котри ше виводзели на „Червеней ружи“ або на „Ружовей заградки“. Треба ту спомнуц же ше Юлиян Рамач Чамо опробовал и у компонованю музики и за театрални представи за одроснутих и за дзеци. Найчастейшого сотруднїка-текстописателя находзел у своєй власней шестри Меланиї Римар.
Нєсподзивано умар 24. юния 2016. року у Руским Керестуре, дзе є и поховани. Народни оркестер Дому култури ноши його мено.