Порядни член Сербскей академиї наукох и уметносцох, предсидатель Одбору за физику САНУ
Академик Федор Гербут народзени 2. мая 1932. року у Вербаше. Штири класи основней школи закончел у Руским Керестуре, а потим ше зоз фамелию преселєл до Нового Саду, дзе предлужел школованє и закончел ґимназию.
На Природно-математични факултет у Беоґрадзе, студийску ґрупу физичней хемиї, ше уписал 1952. року. После двох рокох ше преруцел на студиї физики. Дипломовал 1956. року, и як асистент почал робиц на Институту за физику, хемию и биолоґию ”Борис Кидрич” у Винчи. Робел на Оддзелєню теорийней физики и тримал курс о теориї вироятносци.
У периодзе од 1960. по 1963. рок бул на постдипломских студийох на Универзитету у Бриминґему (Анґлия), на Оддзелєню за математичну физику, дзе на чолє бул Рудолф Е. Паєрлс, єден з водзацих физичарох того часу. Гербут докторовал 1964. року з обласци нуклеарней физики.
Як докторовал, враца ше до СФРЮ и опредзелює ше за наукову роботу у обласци квантней механїки. На Институту у Винчи крадши час роби як асистент, а у периодзе од 1965. по 1976. рок роби як висши наукови сотруднїк.
Як єден з водзацих физичарох теоретичарох, др Федор Гербут 1988. року постава дописни член Сербскей академиї наукох и уметносцох, а 2003. року и порядни член. Його приступна бешеда ношела наслов ”Фундаменти квантней механїки нєшка”.
През шицку наукову роботу, др Гербут ше занїмал зоз виучованьом основох квантней механїки. Обявел вецей як 90 науково роботи у медзинародних часописох. Його роботи цитирани у вецей як 150 наукових стат’йох ширцом швета.
Академик Федор Гербут бул предсидатель Одбору за физику САНУ од 2007. року. За свою наукову роботу достал награду Института у Винчи 1968. року.
До пензиї пошол 1997. року.
Литература
- Мено под биоґрафску єдинку Федор Гербут спомина ше на вецей як шейсц интернет бокох.