Др Дюра Пап (дохтор Пабянка, як го Керерстурци волали) народзени у Руским Керестуре 1913. року. Основну школу закончел у родним валалє, а студиї медицини у Заґребе 1939. року. Обовязни лїкарски стаж окончел у Вельким Бечкереку (Зренянин), а 1941. року приходзи до Руского Керестура, алє є нєодлуга мобилизовани до войска як резервни официр и лїкар. Єден рок робел на Косове. По ошлєбодзеню ше враца до родного Керестура и у рамикох Здравственей станїци снує Совитовалїще за ваготни жени и положнїци. З нєвистату и практично дзеньаноцну роботу у Совитовалїщу приходзи до нєвироятних резултатох у наступних рокох, як у своїм валалє, так и у сушедних местох: смертельносц народзених дзецох зведзена на нулу. То спричинєло вельку увагу у медицинских кругох того часу – за резултати роботи єдного валалского лїкара, та му аж и УНИЦЕФ додзелює припознанє и дарує амбуланти у Керестуре найсучаснєйшу комплетну опрему за Совитовалїще. Др Пап ше нє застановя на тих резултатох, та уж 1950. року обезпечує ретґен апарат, хтори му у дальшей роботи зоз жительством помага у каждодньовей дияґностики охореньох. Року 1960. одходзи до Заґребу на специялизацию з рентґенолоґиї, источашнє роби у Доме здравя “Максимир”, алє ше, нажаль, барз вчас похорел, найскорей од пошлїдкох виложеносци рентґен зарйох з апарату.
Активно участвовал у здравственим просвищованю жительох у валалє и околини, як и у дружтвено-политичних орґанизацийох, а бул и одборнїк Скупштини општини.
Умар у 48. року живота 1961. року. Жителє Руского Керестура, Крушчичу, Бачкого Грачацу и Косанчичу го у барз вельким чишлє випровадзели до вичного дому.