Наташа Еделински Миколка, дзивоцке Регак, народзена 27. юлия 1985. року. Основну школу и Ґимназию закончела у Руским Керестуре, потим студиї на Факултету Политичних Наукох у Беоґрадзе, як дипломовани политиколоґ за медзинародни питаня. 2010. року ше одала за Владимира Еделинския Миколку, хтори ше истого року пошвецел за паноца. У септембру 2011. року супруг єй достал службу на парохиї у Беркасове, дзе и нєшка жию. 2018. року достали дзивче, Диону.
Поезию почала писац у основней школи и од теди участвовала на велїх поетских вечарох и стретнуцох. Як штредньошколка участвовала на вецей литературних конкурсох. Найзначнєйши тоти дзе була вибрана спомедзи вельо конкурентох зоз цалей Сербиї же би була учашнїк на Шестей Поетскей Школи у Беоґрадзе школского 2002/03. року. 2003/04. року конкуровала зоз збирку гаику поезиї на наградни конкурс Десанка Максимович у Валєве, зоз хтору була вибрана до найузшого кругу конкурентох.
Свойо писнї як школярка обявйовала у школских новинох, у часопису МАК и у Литературним слове, а гаику поезия єй обявена по руски и по анґлийски и у интернет виданю Америцкого часопису Руснн. Поезия єй заступена и у збирки младих поетесох 9 риби и антолоґиї поезиї младих Дзеци з урбаного гумна. Видата єй самостойну збирка поезиї Ошмихи/Осмеси, хтора вишла двоязично, по руски и по сербски.
Активна є у Руским културним живоце од малючка. У Руским Керестуре танцовала у фолклору, шпивала у хору и у шпивацкей ґрупи, була активна у театре, участвовала у орґанизациї наших фестивалох и манифестацийох. Свою учасц у културним живоце Руснацох предлужує и як панїматка у Сриме, у КПД Иван Котляревски у Бикич Долу, дзе шпивала зоз Бикичанками и у КПД Дюра Киш у Шиду, дзе була активна у фолклору и у младшей шпивацкей ґрупи, хтору и водзи од другей половки 2012. року по нєшка, а тиж робела и зоз дзецинску драмску секцию.
Поезия
Зоз циклуса Єшень:
3.
Прервал цихосц сна;
Розбавени звук витра –
– Танєц у фарбох.
9.
У барки мрежа
зоз конарох; Лапела
себе сухи лїст.
10.
Роздражє змислу;
Одпирхла глєдаюци
Яр – Ластовичка.
12.
Виражуюци
боль – одпаднул сам; Жовти
Черешньов лїсток.
13.
Поверх конарох
цихосц; Шпив птицох заглух
у смутку нєба.
16.
Зоз слизох цмоти
сто швети горезначки
скапу у бари.
17.
Ранши пах дижджу;
Одламани конари –
Непреспана ноц.
19.
Заспани циклус
живота; Яр зобудзи
якиш нови швет.