Олена Папуґа народзена 10. юния 1964. у Руским Керестуре.
Основне и стреднє образованє здобула у Руским Керестуре, а на Филозофским факултету Универзитета у Новим Садзе закончела Руски язик и литературу и Сербски язик и литературу.
Занята є у Новинско-видавательней установи „Руске слово” як редакторка рубрики Нашо места. Занїма ше з прекладаньом, лекторованьом, а Дружво за руски язик и литературу и културу з Нового Саду и Дружтво Руснацох з Рєки, видали єй кнїжку з етнолоґиї „Стара руска хижа”. Тота кнїжка преложена и на сербски язик.
После парламентарних виберанкох 2008. року вибрана є за посланїцу Лиґи социялдемократох Войводини у Народней скупштини Републики Сербиї. Народна посланїца була од 2008-2020. рок.
У Народней скупштини Републики Сербиї була членїца Одбору за образованє, науку и технолоґийни розвой, и информатичне дружтво, Одбора за людски и меншински права и родну ровноправносц, Одбору за польопривреду, лєсарство и водопривреду, предсидателька Роботней ґрупи за национални меншини, Роботней групи за змоцньованє капацитетох особох з инвалидитетом у политики, була координаторка Женскей парламентарней мрежи.
После виберанкох за посланїкох у Скупштини Автономней Покраїни Войводини, 2020. року вибрана є за посланїцу у Скупштини Автономней Покраїни Войводини. Алє на тим месце дала задзекованє, бо ю Влада Републики Сербиї, у децембру 2020. року, меновала за державного секретара у Министерстве за людски и меншински права и дружтвени диялоґ. Тоту функцию окончовала по 2022. рок.
Основала Здруженє гражданох „Руска лиґа” прейґ хторого вошла до составу Националного совиту Руснацох националней меншини 2010. року. Членїца є Националного совиту рускей националней меншини у штирох мандатох. У Националним совиту рускей националней меншини була предсидателька Одбору за службене хаснованє язика и писма и Одбору за образованє.