Проф. др Надежда Ружич (дзивоцке презвиско Кочиш), технолоґ-енолоґ, професор Универзитета (Нови Сад, 4.02.1940 – Нови Сад, 3.01.2002). Оцец Евґений бул економиста, а мац Амалия з фамелиї Тамаш. У родним варошу закончела основну школу и ґимназию (1959), а дипломовала на Технолоґийним факултету, поживови напрям, технолоґию вина (1963). Маґистерску роботу одбранєла 1970, а докторат 1975, з тему Прилог познаваню сумпор-водонїку у технолоґиї вина. За асистента на Техонолоґийним факултету вибрана є 1964, за доцента 1976, позарядови професор постала 1982, а рядови 1988. року. Руководзела з Катедру за технолоґию вина. Продекан за наставу була 1981-83, а у двох мандатох проректор Универзитерта за наставу (1987-91). Була у Риме на фаховим усовершованю у обласци енолоґиї (1963) и на студийним пребуваню у Чехословацкей, Австриї, Французкей и Италиї. Була на длужносци секретара СИЗ-а за образованє кадрох технїчних и польопривредних фахох у Войводини (1983-87) и була член Союзного координацийного одбору за медзинародне културно-просвитне и технїчне сотруднїцтво (1985-89).
Авторка є седем наукових проєктох и технолоґийних ришеньох и авторка новей сорти виновей лози. Обяверла два моноґрафиї и єден учебнїк, а найважнєйша єй кнїжка ноши наслов Вино (2000).
Ношитель є Повелї городу Нового Саду (1980) и добитнїца повельох зоз златну медалю Универзитета (1991) и Технолоґийного факултету (1999).
Найзначнєйши роботи:
- Промена садржаја полифенолних једињења у црним винима током вишегодишњег чувања (1983);
- Испитивање бактероцидног дејства белих и црних вина (1986);
- Хемијски састав и органолептичке особине вина интерспециес хибрида у процесу селекције (1989);
- Утицај фунгицида ронилана на транспортни систем глукозе у ћелијама винског квасца (1990);
- Утицај реалне киселости шире на садржај ацеталдехида у вину (12992);
- Утицај цинка у шири на садржај глицерола у вину (1995).