Силвестер Такач бул член першей шампионскей ґенерациї ФК „Войводина” зоз 1966. року и єден з найлєпших бавячох и найлєпших стрилцох у историї того фодбалского клуба.
Народзени є 8. новембра 1940. року у Дюрдьове, у рускей фамелиї зоз дзевецерима дзецми, хтора барз швидко остала без обидвоїх родичох. Кед мал лєм пейц роки, його фамелия се приселєла до Нового Саду дзе закончел основну школу и виучел за скравца, а познєйше и дипломовал на Висшей економскей школи.
До юниорского тиму ФК „Войводина” вошол ище док бул у основней школи, а його талант замерковали тренере Миливой Дракулич и Франя Хирман, та го пошвидко поставели за капитена своєй ґенерациї, цо бул аж по уход до першого тиму 1958. року.
За сениорски тим Войводини одбавел 182 першенствени стретнуца и посцигнул 62 ґоли, по чим ше находзи на штвартим месце вичней лїстини клубских стрилцох. Зоз 13 посцигнутима ґолами у сезони 1965/66 бул найлєпши стрилєц екипи и так єй помогнул же би дошла до шампионскей титули. Наиходзацей сезони посцигнул штири ґоли у Купу евроспких шампионох, а два ше окреме памета на стретнуцу процив Атлетика зоз Мадриду. После того змаганя, Такач кариєру предлужел у Французкей, а од средствох хтори заробел од його трансферу, управа Войводини поставела два рефлектори на стадион „Карадьордє”, хтори теди символично наволани „Такачово очи”.
По одходу з Войводини мал успишну интернационалну кариєру, понеже наступал за Рен и Стандард з Лиєжа, з котрим освоєл два титули шампиона Белґиї и у сезони 1971/72 зоз пейц посцигнутима ґолами, подзелєл перше место на лїстини стрилцох у Купу европских шампионох того року.
После законченя активней фодбалскей кариєри пошвецел ше тренерскей роботи. Найвекши шлїд охабел у Сошоу и Ници, з котрим ше му удало освоїц Куп Французкей.
За репрезентацию Югославиї одбавел 15 стретнуца и посцигнул два ґоли, а бул и член екипи хтора 1960. року освоєла златну медалю на Олимпийских бавискох у Риму.
Силвестер Такач нєшка жиє з фамелию у Французкей.