Юлиян Колєсар ше народзел 15. юлия 1927. року у Дюрдьове, а умар 1991. року у Монтреалу (Канада). Основну школу закончел у Дюрдьове, а 1949. року закончел за шлосера. Истого року преходзи до Нового Саду и уписує Стредню школу за применєну уметносц хтору дипломовал 1954. року.
Потим ше уписал на Висшу педаґоґийну школу, алє ю нє законел, бо почал робиц у Дневнику, новосадских дньових новинох, по 1958. рок кед емиґровал до Белґиї, остал там два роки, врацел ше до Югославиї, меня места биваня од Нового Саду, прейґ Заґреба и Пули и наостатку ше на два роки становел у Паризу (1966-1968) одкадз прешол до Зєдинєних Aмерицких Dержавох, перше до Филаделфиї, єден час до Нюйорку, а вец знова до Филаделфиї, же би конєчно 1973. року прешол до Канади, до Монтреалу дзе жил по свою шмерц.
Цали час малює, алє и пише, бо уж 1964. року кед почало виходзиц Литературне слово, додаток Руского слова, почина обявйовац по руски и автор є першей кнїжки у едициї Жридла кнїжки под назву „Колїска слункова”. Зоз малярства обезпечовал себе средства за живот, а його интересованя за руску историю и етноґрафию ше после виселєня зоз жеми интензивовали, нєпреривно виглєдовал символи и мотиви зоз руского етноґрафского, насампредз подобового нашлїдства, а тих написаних його роботох ше вельо назбералo так же му Руске слово 1996. року обявело рукопис под назву „История руского народного мена”. Велї свойо роботи посилал значним особом и институцийом зоз рускей култури, у наздаваню же их буду знац ценїц и чувац, даєдни постали єдна часц у дюрдьовскей етноґрафскей збирки „Руска одлога”, як и у дюрдьовскей церкви (портрети значних особох зоз рускей грекокатолїцкей церкви).