Инициятор и главни реализатор снованя Руского народного просвитного дружтва (РНПД), його перши подпредсидатель, а познєйше и предсидатель; длугорочни редактор Руского календара, наш визначни священїк и културни дїяч.

Народзел ше у Руским Керестуре 23. марца 1877. року у селянскей фамилиї. Оцец Янко, мац Мария (народзена Киш). До основней школи започал ходзиц у своїм валалє, а предлужел у Винковцох, дзе закончел и першу класу ґимназиї. Школованє предлужел у Заґребе, дзе матуровал 1896. року, як питомец Грекокатолїцкей семинариї. Штири роки богословиї  закончел у Ужгородзе. За священїка є рукоположени  7. априла 1901. року. Перше робел у владическей канцелариї у Крижевцох, а  дочасни администратор парохиї у Сошицох (Жумберак) бул у першей половки 1902. року. Отамаль приходзи до Руского Керестура, дзе окончовал длужносц пароха  а полни 11 роки робел и як  катехета. Як парох службовал у Дюрдьове, Коцуре и Старим Вербаше, дзе остал по конєц живота (21. януара 1950. року) и там є поховани.

Ище як студент богословиї ступел до контакту зоз Володимиром Гнатюком.  Инспировал ше з його идеями о  националним препороду  Русинох у тедишнєй Угорскей. Його дїялносц на тим планє постала обачлїва од конца 1912. року. Биндас теди поволал руску  интелиґенцию  да помогнє друкованє перших  руских новинох алє тота идея нє витворена пре Першу шветову войну. Вон тиж иницировал зволованє „народней рускей просвитней оранизацийней схадзки“. Тота схадзка и отримана у Новим Садзе 2. юлия 1919. року. Теди принєшена одлука з котру основане Руске народне просвитне дружтво (РНПД) зоз шедзиском у Руским Керестуре. За предсидателя вибрани керестурски парох о. Михайло Мудри, а Дюра Биндас постал його перши подпредсидатель.

Од 1921. по 1932. и од 1936. по 1940. рок ушорйовал Руски календар. Биндас свою дїялносц пошвецел унапредзованю и витворйованю програмней дїялносци РНПД, окреме после 1936. року, кед после шмерци о. Михайла Мудрого  станул на чоло Дружтва. Як актуалному предсидательови под час Другей шветовей войни, кед Бачку окупировало мадярске фашистичне войско, припадла му длужносц остарац ше же би ше зачувал чежко здобути маєток РНПД. Теди ше РНПД формално приключело ґу тедишнєй власци лоялней „Орґанизациї грекокатолицкей молодежи“ зоз шедзиском у Унґваре (Ужгородзе) зоз чим фактично и престало исновац Руске народне просвитне дружтво.

После ошлєбодзеня, 21. октобра 1945. року у Руским Керестуре основана нова руска орґанизация под меном „Руска матка“, котра превжала основни инґеренциї загашеного РНПД, алє „на нових идейних основох“.А то значело же священїки нє були пожадни як руководзаци особи у нєй. Од теди и о. Дюра Биндас шицки свойо творчи потенцияли пошвецел душпастирскей роботи.

 Литература

  1. о. Проф. Др Роман Миз: Священїки дакедишнього Осєцкого викарията; видавателє: Парохия св. Петра и Павла, Нови Сад и „Максима“ друкарня и видавательна хижа, Петроварадин, 2016, б. 55-60.
  2. Янко Фейса: 20 роки од шмерци Дюри Биндаса – Орґанизатор културного препороду; „Шветлосц“ ч. 1/1970, б.72-74.
  3. Янко Рамач: На крижней драги, Руснаци у Югославиї од 1918-1941. року,  „Руске слово“ Н. Сад, 2016, б. 31-48.
  4. Дюра Латяк: Улога о. Дюри Биндаса у националним препороду бачванско-сримских Руснацох, „Шветлосц“ ч. 4/2017.