Поет, публицист, просвитни роботнїк, адвокат, судия

Народзел ше 8. марца 1898. року у Руским Керестуре дзе закончел основну школу (1909), класичну ґимназию у Заґребе (1909-1917). На Правним факултету  тиж у Заґребе  дипломовал 1924. року а докторску дисертацию одбранєл на истим факултету 1928. року.

Ище як студент права, же би обезпечел средства за дальше школованє, роби як учитель на Билей (под Кулу), потим як судски службенїк у Вуковаре и Осиєку (1926-1927). После докторованя роби у Новей Ґрадишки. Як судия  почал робиц у  Окружним суду у Сримскей Митровици, алє поднєс одказ на службу и отворел власну адвокатску канцеларию у Вуковаре (1932-1934).Пошвидко ше враца до Руского Керестура, и  як административни службенїк роби у Кули (1936-1941). Под час Другей шветовей войни мадярска окупацийна власц го премесцела на службу до Оджаку (1941-1944). После ошлєбодзеня роби як викладач у ґимназиї у Руским Керестуре, од єй снованя 1945. та по 1952. рок. Преходзи на службу до Кули, дзе роби як судски референт, а потим до Суботици, дзе 1962. року одходзи до пензиї. Там остал жиц по конєц живота (8. децембер 1981. року), а там є и поховани.

Писац почал ище як школяр ґимназиї. Перши писнї му обявени у „Руским календаре“ за 1925. рок. Вєдно з Михайлом Ковачом пририхтал до друку Руско-українски алманах бачванско-сримских писательох (1936), а вишла му и окремна збирка його писньох под насловом „Ровнїно моя широка“ (1973), котру до друку пририхтал учитель и поет Василь Мудри.

Ношитель є награди „Искри култури“ КПЗ Войводини (за 1975. рок), а од 2001. року Руснаци у Суботици кажди рок орґанизую литературну манифестацию под назву „Яр др Мафтея Виная“.

Литература:

  1. Дюра Папгаргаї: Доаєн нашей литератури, „Шветлосц“ ч. 4/1968, б. 266-271, „Руске слово“ Руски Керестур.
  2. Василь Мудри: Щиросц и цеплота у поезиї Мафтея Виная, „Ровнїно моя широка“, писнї, 1973, „Руске слово“ Н. Сад, б. 7-17.
  3. Др Юлиян Тамаш: История рускей литератури; Завод за уџбенике и наставна средства, Београд, 1997, б. 515-517.
  4. Руснаци у Суботици, моноґрафия, Завод за културу войводянских Руснацох, Нови Сад, 2018, б.15-25.