Длугорочни парох керестурски, перши предсидатель Руского народного просвитного дружтва (РНПД)
Народзел ше 30. децембра 1874. року у Руским Керестуре. Основну школу закончел у Руским Керестуре. Оцец Янко, а мац Мария (народзена Роман). Основну школу закончел у своїм валалє при славному учительови Петрови Кузмякови. Першу класу ґимназиї, закончел вєдно зоз владиком Дионизийом Нярадийом у Винковцох, а познєйши класи у Заґребе як питомец нашей семинариї. Богословию закончел у Заґребе. За сващенїка є, як нєоженєти, пошвецени у Дюрдьове 21. октобра 1900. року. Пошвецел го крижевски владика Юлий Дрогобецки.
Ище як неоєрей бул меновани за актуара владическей канцелариї у Крижевцох, а 1902. року постава душпастир у Прґомелю, администровал и Дишник, а доходзел и до Липовлянох.
Од 12. марца 1912. року вон администратор „in spiritualibus“ у Руским Кеєрестуре, од 10. януара 1918. є „in materialibus et in spiritualibus“, a oд 12. фебруара 1919. року постава керестурски парох. З декретом Святого Отца од 1. марца 1924. постал тайни „коморник“ Його святосци папи Пия ХІ.
На Сновательней схадзки РНПД 2. юлия 1919. року вибрани є за предсидателя и тоту длужносц окончовал до своєй шмерци 13. октобра 1936. року. Старал ше о ширеню дїялносци РНПД по шицких местох дзе були нашо парохиї, як и о материялней бази за тоту дїялносц. Вельо роки ше дописовал зоз др Гавриїлом Костельником и прилапйовал його поради у вязи зоз програмну дїялносцу РНПД. За купованє Народного дому и на друкарню подаровал 35.000 тедишнї динари, а понеже нє мал своїх нашлїднїкох, церкви и „Просвити“ охабел и цали свой рухоми и нєрухоми маєток.
Свойо написи найчастейше обявйовал у „Руских новинох“ и Руским календаре.
Умар у Руским Керестуре 13. октобра, а поховани є на керестурским теметове 15. октобра 1936. року.
Литература
о. Проф. Др Роман Миз: Священїки дакедишнього Осєцкого викарията; видавателє: Парохия св. Петра и Павла, Нови Сад и „Максима“ друкарня и видавательна хижа, Петроварадин, 2016, б. 236-237.