Визначни югославянски композитор, педаґоґ, интелектуалєц, аутор велїх орхестралних и хорских и соло композицийох

Народзени 1. авґуста 1937. року у Руским Керестуре. Уписал ше у Новим Садзе до ґимназиї дзе му ше фамелия преселєла зоз Руского Керестура. После велькей матури, за нєполни два роки, закончує перше нїзшу, а вец и стредню музичну школу тиж у Новим Садзе. Студиї клавира уписал на Музичней академиї у Беоґрадзе,  алє  ше преориєнтовал на студий композициї дзе и дипломовал.

Педаґоґийну дїялносц започал у Стреднєй музичней школи „Исидор Баїч” у Новим Садзе дзе  єден час є и директор, а 1976. року преходзи на Академию уметносцох у Новим Садзе, дзе робел як професор. За декана тей Академиї вибрани є 1982. року. Професийни анґажман предлужує як секретар Союзу здруженьох композиторох Югославиї. Орґанизацийно консолидовал Союз, а окреме на информатичним осучасньованю його дїялносци.

Иван Ковач бул активни и углядни дїяч у новосадских и покраїнских  асоцияцийох и орґанизацийох култури у Културно-просвитней заєднїци Войводини, Здруженю композиторох Войводини, котрому єден час бул и на чолє.

Иван Ковач бул през цали час вязани и за  руску, музичну творчосц, окреме за фестивал „Червена ружа”. Значни допринос рускому музичному животу представя збирка його композицийох за глас и клавир, наменєна дзецом, под назву „Чудесни дзвон”.

Музични теоретичаре тримали же його сензибилитет найбаржей одражує композиция писана за камерни состави.Писал и соло писнї, хорски композициї и композициї за вельки орхестри. Окремне место забера його ораторийна фреска „АПОТЕОЗА 41” котру премиєрно виведол хор и орхестра Музичного центру Войводини у Новим Садзе.

Нєсподзивана хорота го застала на функциї секретара Союзу здруженьох композиторох Югославиї. После барз краткого хорованя умар у Новим Садзе 18. априла 1992. року, у полней творчей узретосци. Поховани є 21. априла 1992. року на новoсадским Городским теметове

Литература

  1. 1.Интеґрални текст за биоґрафску одреднїцу Иван Ковач
  2. 2. Дюра Латяк, порихтал за ІІ  том моноґрафиї о 50 „Червених ружох“
  3. 3. Єлена Перковичова, Шветлосц число 4/ 2017. Бок 565-568.
  4. 4. Душан Михалек, Шветлосц 2/2017. бок 265-278.
  5. https://sr.wikipedia.org/wiki/Ivan_Kova%C4%8Dhttps://sr.wikipedia.org/wiki/Ivan_Kova%C4%8D
  6. https://www.youtube.com/watch?v=5B2vtRMt9jM
  7. https://www.scribd.com/document/358605837/Ivan-Kova%C4%8D
  8. https://nar.org.rs Иван Ковач ,Доприношенє Руснацох розвою Нового Саду, аудио сериял , Новинарска асоцияция Руснацох,  продукция 2016.